106 ngut kiba ïoh pang COVID mynta ka sngi, 8 ngut kiba la ïap

Shillong, Nailar 23: Ka Jylla ha ka sngi U Blei ka la sakhi ba ka jingdon kiba ioh ia u khniang jingpang coronavirus ka la nang kiew arted kata haduh 106 ngut bad uwei pat uba khlad na ka daw jong utei u virus kaba pynlong ia ka jylla ban don mynta haduh phra ngut kiba la khlad na utei u khniang jingpang.

Haba pyntip ia kane, u Director of Health Services, Dr. Aman Warr u la ong ba utei u ba khlad noh hynne ka sngi u dei na Tikrikilla bad udei uba la tip kyrteng kum u Maheshwar Pratap Choubey 84 snem.

Katkum ka jingiathuh jong u, utei u rangbah u la wan shah sumar ha Tura Civil Hospital, West Garo Hills ha ka 18tarik mynta u bnai bad khlad noh pat ha ka step 23tarik ha ka por 12:45 AM.

“Ka daw jong ka jingiap jong u kadei na ka jingshem shitom ban ring mynsiem ryngkat ka jingioh ia u COVID. U don ruh ka jingshitom klongsnam, hypertension bad kiwei kiwei,” ong u DHS.

Haba phai pat sha ki 106 ngut kiba ioh thymmai ia utei u virus, tang ka East Khasi Hills marwei ka la ong haduh 64 ngut kata kynthup ia 26 ki shipai bad 38 ki riew paidbah, nangta West Khasi Hills – 16 ngut, South Garo Hills – 10, West Garo Hills – 9 ngut, East Jaintia Hills – 03, Ri-Bhoi -03 bad North Garo Hills – 01.

Lada phai pat sha ki distrik, ka jingdon kiba ioh ia utei u virus haduh mynta ki long East Khasi Hills – 723 kata haduh 267 ki shipai, 456 ngut ki paidbah, West Garo Hills – 223ngut (kata shipai – 146 bad paidbah – 77), Ri-Bhoi – 94ngut (shipai – 26 bad paidbah – 68), West Khasi Hills – 44, East Jaintia Hills – 14, South Garo Hills – 12 ngut, North Garo Hills – 12, South West Garo Hills – 04, East Garo Hills – 03, West Jaintia Hills – 03 bad South West Khasi Hills – 01.

Na ka liang u DHS u la pyntip ruh ba ki don pat haduh 07 ngut kiba koit hynne ka sngi ba kynthup ia lai ngut na East Khasi Hills, ar na Ri Bhoi bad iwei na East Jaintia.