167 ngut ki riew paidbah kiba ïoh pang Corona ha East Khasi hills, 50 ha Ri Bhoi

Shillong, Naitung 27 : Ka Meghalaya ha ka sngi U Blei ka la sakhi ia ka jingdon haduh 56 ngut ki briew kiba ioh thymmai ia u COVID -19 ha ka jylla tang ha ki 24 kynta kaba pynlong ia ka jylla ban don haduh 562 ngut.

Na ka liang u Director ka tnad ka Koit ka Khiah, Dr. Aman War u la iathuh ba ka tang ha East Khasi Hills ki la don haduh 37 ngut kiba ioh thymmai bad napdeng kitei 23 ngut kidei na ki BSF, sawngut na ki shipai bad 09 ngut na ki riewpaidbah.

Nangta na West Khasi Hills pat ki don 03 ngut, Ri Bhoi – 09 (04 ki shipai bad 05 ki paidbah), North Garo Hills -01, West Jaiñtia Hills -01, bad West Jaiñtia Hills -05.

Na ki 56 ngut kiba ioh positive, ka East Jaintia kaba ioh haduh 5 ngut kiba ioh thymmai saw ngut dei na kiba kynduh ia kiba ioh positive na ka test naphang bad iwei pat dei I nongtrei ka Pamra Paithlu PHC.

Ha West Jaintia Hills pat dei iba dang wanphai na Assam katba ha West Khasi Hills baroh lai ngut dei ki pulit kiba wanphai na Assam bad 2ngut na Delhi.

Ka Ri Bhoi District kaba don haduh 9ngut kiba ioh positive, saw ngut na kitei dei ki shipai ha Rangmen ba wanphai na Assam, lai ngut ki riewpaidbah kiba wan na Assam bad iwei ba leit ap nongpang ha RP Chest Hospital, Shillong.

Uba ioh positive ha North Garo Hills pat dei u nongtrei ka MECL ba dang wanphai na Assam.

Napdeng kiba ioh positive na East Khasi Hills, lai ngut kidei na Marbisu kiba ia bit na kawei ka nurse ba trei ha NEIGRIHMS.

Kumba long mynta, ka East Khasi Hills ka don haduh 462 ngut (BSF – 270, paidbah – 167, shipai – 25), West Khasi Hills – lai, Ri-Bhoi – 50, West Jaintia Hills – 10, East Jaintia Hills – 13, West Garo Hills – 15, South West Garo Hills – four, South Garo Hills – 2, East Garo Hills – 1 bad North Garo Hills – 2.

Ha kane ka sngi ki la don haduh 41 ngut kiba koit, kynthup 39 ngut ki BSF ha East Khasi Hills bad arngut ki paidbah. Lada kheinlang baroh, kiba koit ki la don mynta 135 ngut.