17 ngut kiba ïoh pang Covid-19 mynta ka sngi

Shillong, Nailar 8: Ki la don haduh 17ngut ki paidbah kiba dang ioh thymmai ia u khniang Coronavirus ha kane ka sngi Saitjaiñ hynrei ha kajuh ka por pat ki la don haduh 12 ngut kiba koit, ong u Director ka tnad ka Koit ka Khiah, Dr. Aman War.

Haba kren bad ki lad pathai khubor, u Dr. Aman u la iathuh ba na ki 17ngut, tang na East Khasi Hills ki don haduh 12 ngut, bud ka North Garo Hills da ki 02 ngut, bad West Garo Hills 03 ngut.

La iathuh ruh ba na kitei ki 12 ngut haduh 7 ngut kidei ki nongtrei jong ka RP Chest Hospital bad 05 ngut kiwei pat kidei na ki dong bapher bapher jong ka nongbah Shillong.

Haba iadei bad kitei ki 07 ngut ki nongtrei ka RP Chest Hospital na ka liang u Dr. Aman u la ong ba mynta ki dang wad bniah kumno kitei ki nongtrei hospital ki ioh ia utei u khñiang jingpang.

Haba iadei pat bad ka jingleit jong u Pharmacist ka Civil Hospital sha Rangthong, u DHS u la ong ba haduh mynta ki la ioh jingtip ba la dep buddien palat spah ngut ki briew bad don ruh kiba la dep test kiba paw negative lut.

“Ngi dang ap mynta sa ia ka report Jong ka kurim jong u ruh,” ong u DHS da kaba iathuh ba Utei u pharmacist u la dep ban leit ruh shaduh Rani Motors Rani sha District Jail bad kylleng ki jaka.

Kumba long mynta ka jingdon kiba ioh COVID ka la poi 594ngut. Tang ha East Khasi Hills ki long – 453 (BSF-142, paidbah – 245 bad shipai – 66), West Khasi Hills – 06, Ri -Bhoi 65, West Jaintia Hills – 15, East Jaintia Hills 18, West Garo Hills 31, South West Garo Hills 02, South Garo Hills 02ngut bad North Garo Hills arngut.

Na ki 12ngut kiba koit, 04ngut kidei na East Khasi Hills ba kynthup ia uwei u BSF bad 03ngut ki paidbah nangta Ri Bhoi 7 ngut bad West Jaintia Hills iwei kaba pynlong ia ka jylla mynta ban don haduh 423 ngut kiba la koit katba kiba khlad pat ki la poi 06 ngut.