22 ngut kiba ïoh Covid-19 mynta ka sngi, pynkhreh ka NEIGRIHMS ïa ka Plasma Bank

Shillong, Nailar 05: Ki la don 22ngut ki briew kiba ïoh ïa u khñiang jingpang Coronavirus ha kane ka sngi Balang kynthup ïa ki 19 ngut  tang na East Khasi Hills, uwei u BSF na  West Garo Hills bad arngut ki riew paidbah na South West Garo Hills.

Haba phai sha ka East Khasi Hills katkum ka jingïathuh da u Director ka tnad ka Koit ka Khiah Dr. Aman War,  tad haduh ka janmiet sngi Balang ka jingdon kiba pang baroh ki la don haduh 595 ngut, bad na kine tang ka East Khai Hills ka la don haduh 487 ngut ba kynthup ïa ki 188 ngut ki BSF, 241 ngut ki paidbah bad 58 ngut ki shipai.

Ha kiwei pat ki distrik ka jingdon kiba pang ki long West Khasi Hills – 05, Ri Bhoi – 51, West Jaiñtia Hills – 16, East Jaiñtia Hills – 17, West Garo Hills – 15, South West Garo Hills – 02 bad South Garo Hills – 02. 

Ha kane, ka jylla ka la sakhi ba ki don haduh 09 ngut kiba koit, kata san ngut na East Khasi Hills bad 04ngut na Ri Bhoi kaba pynlong ia ka jylla kaban kot mynta haduh 339 ngut kiba koit.

Kumba long haduh mynta ki sample kiba la phah baroh ban test ki long 39,533 tylli bad na kine 38,062 tylli ki long Negative bad  kiba dang ap pat ki long 552 tylli. Ka jingdon ki briew kiba wan na shabar ka jylla haduh mynta ki long 25,588 ngut.

Ha kajuh ka por, u Symbud Myntri Rangbah u la iathuh ruh ba ka NEIGRIHMS ka dang pynkhreh mynta shaid shaid ban buh noh ia ka plasma bank na ka bynta ka jingdonkam ki paidbah ka Meghalaya bad ka thain shatei lam mihngi baroh kawei.