311 ngut kiba koit na ka jingpang COVID-19 mynta ka sngi

Shillong, Nailur 26: Ka jylla ha ka sngi Saitjaiñ ka la sakhi ba ki don haduh 311 ngut ki briew kiba koit na u COVID-19.

Kane kadei ruh ka sien kaba nyngkong eh ba kin don haduh kattei ngut kiba koit ha ka jylla naduh ba utei u khniang jingpang u poi sha kane ka jylla.

Kitei kiba koit ha kane ka sngi ki kynthup ia ki 234 ngut na East Khasi Hills, 51 ngut na East Jaintia, 16 ngut na Ri Bhoi, 7 ngut na West Garo Hills, 2 ngut na West Khasi Hills bad 1 na West Jaintia Hills. Tang na East Khasi Hills bad Ri Bhoi la sakhi ba ki don haduh  24 ngut ki nongtrei ka koit ka khiah kiba la koit na utei u virus. 

Ha  kane ka juh ka sngi ki la don haduh 54 ngut ki briew kiba dang ioh thymmai ia utei u khniang jingpang. Kitei ki kynthup ia 31 ngut na East Khasi Hills, 12 ngut na West Garo Hills, 6 ngut na East Garo Hills, 2 ngut na Ri Bhoi, 1 na South Garo Hills bad 1 na West Jaintia Hills.

Kumba long mynta ka jingdon kiba pang ha baroh kawei ka jylla ka la kot sha ka 1515 ngut ha kaba tang na East Khasi Hills ki la don haduh 995 ngut, bud sa ka East Jaintia Hills 224 ngut, Ri Bhoi 125 ngut bad West Garo Hills 100 ngut. Kiwei pat ki distrik ki don tang hapoh 100 ngut kiba dang pang.

Haba phai pat sha ka jingdon kiba la koit, ka jylla ka la sakhi ba ki la don haduh 3654 ngut katba ka jingdon kiba iap ka neh da ki 43 ngut hi.

Lada shu khein kyllum baroh ka jingdon kiba koit ka la poi mynta sha ka 70 persen, nangta kiba pang 29 persen bad kiba iap tang kumba 1 persen ei ei.