39 ngut na EKH bad 8 na RIbhoi kiba leit ïathoh sha Khanapara

Shillong, Naitung 21: Ka sorkar jylla ha ka Sngi Ba-ar ka la pynbna ba katkum ki report ba ka ïoh na ki artylli ki Distrik kata na Ri Bhoi bad East Khasi Hill ka paw ba ki don sa sawngut ki briew kiba don bynta ha ka jingleit iathoh sha Khanapara ha u bnai ba la dep.

Haba kren bad ki lad pathai khubor, u Symbud Myntri Rangbah Bah Prestone Tynsong u la iathuh ba ïa kitei ki saw ngut na East Khasi Hills la aiti ha ki bor Distrik ban ujor da ka EJAHAR pyrshah ïa kitei ki briew kumba la dep leh ia kito kiwei shwa kane.

“Ngi aiti ha ka Deputy Commissioner ban leh ïa kaba donkam bad ban file da ka FIR pyrshah ia kitei ki sawngut, kiba ngi ïoh ïa ka jingpynshisha ba ki leit ban shim bynta ha ka jingiathoh ha Greenwood Resort ha Khanapara,” ong Symbud Myntri Rangbah.

La iathuh ruh ba haduh mynta tang na East ki la don haduh 39 ngut kiba poi sha katei ka jingiathoh shongkurim kaba long ha u bnai ba la dep ha Khanapara bad 8 ngut kiwei pat ki dei na Ri Bhoi District.

Ha kajuh ka por la ïathuh ruh ba la aiti ha ki bor Distrik ban wan ia tynrai halor ka jingioh rung jong uwei u bar jylla sha Meghalaya ban wan die jingdie uba la paw mynta ba u ïoh ïa u COVID -19.

Halor kane, u Symbud Myntri Rangbah u la ïathuh ba ka jingbuddien ia ki briew ba utei u rangbah u kynduh ka dang ïaid shakhmat khamtam ba kumno u ïoh ban rung bad shang kylleng.

“U Bah Prestone u la kynthoh ruh ïa ka jingdawa jong ka Congress ba dei ban pyllait paidbah ïa ka kyrteng jong kito kiba ïoh COVID. “Ka Congress ka tip bha ba ki doktor ki hap burom ïa ka hok jong ki nongpang. Kumta kam dei ban leh politik halor u COVID,” u la ong.

Shuh shuh u ong ruh ba ka rai jong ka sorkar ka long ba ïa ka kyrteng jong kiba ïoh positive lane ki High Risk Contact kin pyntip beit tang bad ki nongïalam shnong.