399 klur tyngka la pynlut ka sorkar haduh u bnai Nailur ha ka jingïakhun pyrshah ïa u COVID-19

  • Shillongmail
  • October 6, 2020
  • Comments Off on 399 klur tyngka la pynlut ka sorkar haduh u bnai Nailur ha ka jingïakhun pyrshah ïa u COVID-19

Shillong, Risaw 6: Ka sorkar jylla ka la pynlut haduh 399 klur tyngka naduh u Lber tad haduh ba kut jong u Nailur mynta u snem ha ka jingiakhun ia ka thma COVID, pynbna paidbah u Symbud Myntri Rangbah ka jylla, Bah Prestone Tynsong hynne ka janmiet.


Haba kren bad ki lad pathai khubor, u Bah Prestone u la iathuh ba kitei ki jinglut ki kynthup ia ki jingthied kiba bun bha ha ka tnad NHM kaba la pynngat lang naduh ka jinglut ha ki Corona Care Centre, thied PPE, ambulance bad kiwei kiwei ki jinglut kiba kot sha ka 188. 9 klur tyngka.


Nangta sa 82.4 klur tyngka ha ka tnad Directorate of Health Services kaba kynthup ban thied ia  ki mashin, oxygen cylinder, tiar thew BP, ki thermal scanner bad bun kiwei kiwei.


Ha ka thup Chief Minister Special Grant pat ka jinglut ka long 14.7 klur na ka bynta ban siew sha ki nongshong shnong ka jylla kiba sahkut ha kylleng ka ri, nangta ban leit shaw ia kito kiba wan na shabar jylla bad ruh ban thied ia ki tiar ba donkam.


Nalorkata, na ka Chief Minister Relief Fund la pynlut 7.4 klur ban thied ia ki ambulance, ki tiar ban thep ia ki jaboh na ki jaka sumar, na bynta ki community qurantine centre bad kiwei.


U Symbud Myntri Rangbah u iathuh ruh ba lyngba ka Chief Minister’s Relief Against Wage Loss, ki la pynlut  haduh 51 klur tyngka ban ai jingkyrshan pisa shipor sha kumba 2lak ngut ki nongshong shnong ka jylla kiba la duh bylla na ka daw ka jingwan kynsan ka jingkhangdam ha ka jylla na ka daw ban tehlakam ia u COVID.


La iathuh ruh ba ka sorkar ka pynlut haduh 15 klur tyngka na bynta ban sam mar 25 lak tyngka sha man uwei pa uwei u MLA ba kin ioh ai jingiarap kyrkieh sha ki constituency jong ki lyngba ka skim SRWP.


Nalorkata, la pyntip ruh ba haduh 3.5 klur lyngba ka PM Care Fund na ka bynta kito ki jingdonkam kiba bun jong ki nongbylla ba wan na shabar kynthup ka bai leit bai wan jong ki.


La iathuh ruh ba hapoh ka thup District Mineral Fund (DMM) la pynlut haduh 8.9 klur ban buh ia ki relief camp, screening point bad kiwei kiwei. Lyngba ka SDRF pat la pynlut haduh 23.7 klur tyngka na ka bynta ban buh shuh ia ki laboratory, PPE, thermal scanner, na bynta ki containment zone bad kiwei kiwei.


La pynlut ruh ruh 3.5 klur tyngka na ka thup Urban Affairs ban synreit dawai baroh ki dong ki shnong kiba hap ha sor.


Na kitei ki 399 klur ki jingpynlut, la iathuh ba ka sorkar ka la dep ban siew haduh 251 klur tyngka katba kaba sah pat ka long sa 148 klur.


U Symbud Myntri Rangbah u iathuh ruh ba tad haduh mynta ka sorkar ka dang ioh pdiang 48 klur tyngka ki jingiarap na ka sorkar ha ka jingiakhun ia kane ka khlam.


Kumba halor kane u la ong ba shen ma u ryngkat bad u Myntri Rangbah kin sa leit biang sha Delhi ban kynduh ia ka sorkar pdeng ban kyrshan ia ka jylla.