626 ngut kiba ïoh Covid haduh mynta, 510 kiba la koit

Shillong, Nailar 11: Ki la don haduh 27 ngut ki briew kiba ioh ia u khñiang jingpang coronavirus ha kane ka sngi Ba-ar jong ka taìew kaba pynlong ia ka jylla ban poi mynta haduh 626 ngut ki nongpang ha baroh kawei ka jylla.

Kitei kiba ioh thymmai ki kynthup ia ki 8 ngut na Ri Bhoi,  8 ngut na East Khasi Hills, 7ngut na West Garo Hills, 1 na West Jaiñtia, 1 na South West Khasi Hills, bad arngut na North Garo Hills.

Na Ri Bhoi kiba ioh ia utei u virus ki kynthup ia 6 ngut na CMJ Breweries Byrnihat, uwei u forest guard bad uwei pat ba ia bit na u. Haba kren bad ki lad pathai khubor na ka liang u Director ka tnad ka Koit ka Khiah u la ong ba mynta ki dang wad ia ka tynrai naei utei u forest guard u bit ia utei u virus.

Ha West Jaintia pat katkum ka jingiathuh jong u DHS dei i nurse ba trei ha Norman Tunnel Hospital Jowai katba ha West Garo Hills baroh 7 ngut dei ki shipai BSF.

Ha East Khasi Hills pat na ki 8 ngut, 2 ngut dei ki CRP, 1 u shipai, 1 BSF bad sawngut kiwei pat.

Na ki saw ngut ki riew paidbah uwei udei u nongniah tourist taxi, iwei I nurse ba NEIGRIHMS bad uwei u doktor Ayush ha Civil Hospital Shillong.

La iathuh ruh ba uwei pat uba ioh positive ha South West Khasi Hills udei uba dang wanphai na Gujarat katba ki arngut kiwei pat ha North Garo Hills kidei kiba wanphai na West Bengal

Kumba long mynta na ki 626 ngut kiba ioh ia u khñiang tang ha East Khasi Hills ki la don haduh 425 ngut, kata 88 ngut ki BSF, 69 ngut ki shipai bad 268 ngut ki paidbah. Ha West Khasi Hills – 5, South West Khasi Hills – 1, Ri Bhoi – 93 ngut, West Jaiñtia Hills – 16 ngut, East Jaiñtia Hills – 06 ngut, West Garo Hills – 72 ngut, South West Garo Hills – 2 ngut, South Garo Hills – 2 bad North Garo Hills – 4 ngut.

Kiba koit pat ha kane ka sngi ki long 12 ngut, kata 11 ngut ha East Khasi Hills bad 1 ha West Khasi Hills kaba pynlong ia ka jylla mynta ban don haduh 510 ngut ki ba la koit.