Ba ïoh COVID ki 4 ngut, phah test naphang ka DS Lumpyngad ïa ki nongshong shnong

Shillong, Naitung 25: Ka tnad ka koit ka Khiah ka jylla ha ka step sngi Saitjain ka la leit ban pynlong ia ka jingtest paidbah ia baroh ki nongshong shnong ka Lumpyngad hadien ba ki la don haduh ngut ki nongshong shnong kiba ioh ia u COVID 19.

Katei ka jingtest naphang kadei hadien ka jingkyrpad na ka Dorbar Shnong khnang ba kan long ka jingiada ia ki nongshong shnong hadien ba Utei u virus u la pur ha kawei na ki dong ba don hangtei.

Ha katei ka jingtest naphang kaba la pynlong ha Block 4, la donlang naduh u DMHO, Dr. M Basaiawmoit, nangta u Magistrate Bah M Challam bad ki nongtrei ka koit ka Khiah.

Haba kren bad ki lad pathai khubor, u Rangbah Shnong, Bah Shandalan Talang u la iathuh ba ha katei ka jingtest naphang kaba ki pynlong ka dei na ka bynta ka Block 1, 3 bad 4. Katba na ka bynta ka Block 2 pat kaba la pynngat kum ka Containment Zone ki nongtrei ka koit ka Khiah ki leit hi man la ka iing ban leh ia katei ka test.

U Secretary Shnong, Bah John Lennon Kharkongor pat u la ong ba katkum ka jingiohi jong ki, katei ka jingpur jong u virus ha Lumpyngad kadei na ka jingwan pynphriang ki nongleit iathoh sha Khanapara.

Na ka liang u Magistrate uba donlang hangtei u la ai ka jingiaroh ia ki bor shnong ka Lumpyngad kiba shim ia katei ka jingkitkhlieh ban iakhun lang ia utei u khniang jingpang.