Ba kiew ka bai bording, ha u Myntri Rangbah leit pynsngew ki MLA ka PDF

Shillong, Naitung 20: Ka People’s Democratic Front (PDF), kawei na ki seng sainpyrthei kaba kyrshan ia ka Sorkar Synrop MDA ha ka sngi nyngkong ka la leit ban ia kren bad u Myntri Rangbah, u Conrad K Sangma halor ka mat ba ktah bha ia ki paidbah- ka jingkiew pathar ka bai thang bor ding elektrik- bad kumjuh ban pynkynmaw ban bud dien ia ka jingdawa pynrung ia ka Ktien Khasi ha Khyrnit ba Phra ka Riti Synshar ka Ri India kaba dang sahteng bad ka Sorkar India.

Ia ka kynhun na kane ka seng saiñpyrthei la lam khmat da u Bah Banteidor Lyngdoh, President uba dei ruh u Myntri Sorkar ba dei peit ia ka tnad Agriculture bad Sports, u Bah Hamletson Dohling, Myntri Sorkar ba dei peit ia ka tnad Urban Affairs lem u Bah Jason S Mawlong bad u Bah Gavin M Mylliem, kiba dei ki MLA kynthup ia u Bah Auspicious Lyngdoh, Secretary lem u Bah Ivanlumlang Marbaniang, Chairman ka Party.

“Ka mat kaba ia dei bad ka jingkiew palat ka bai thang bor ding elektrik ka la long ka jingsngew khia na ka liang ka Party bad kumba ngi tip ym tang ha ki Constituency ka PDF hynrei ha kiwei kiwei ki Constituency ruh ki mad kajuh ka jingeh. Ki paidbah ki kyang bad shem jingeh ban siew ia ka namar ka la heh palat”, ong u Bah Banteidor Lyngdoh haba ia kren bad ki nongthoh khubor hadien ka jingwan ia kynduh ia u Myntri Rangbah ha kamra treikam jong u.

“Ki bun bha kum kine ki jingiakynduh jingeh ba kiew palat ka bai thang bor ding bad ka la long palat bad na ka 500 ne 600 tyngka sha ka phew hajar tyngka”, la ong u Bah Banteidor uba la bynrap, “U Myntri Rangbah u la ong ba ki don kum kita kiei kiei kin ia treilang bad iathuh lem bad wanrah ki sakhi ki satar ba biang ba ma u ruh un ïoh ban shim khia mardor”.

“Ngi baroh saw ngut ngi don la ka jong ka jingeh ha ki Constituency na ka daw ka jingkiew ka bai thang bor ding elektrik hynrei kiwei ki Constituency ruh ki mad kajuh ka jingeh bad ka la dei ka por kaba ka ngin hap thaw lad thaw lynti kumno ban weng ia kane ka jingeh”, u la ong.

U MLA na Umsning, u Bah Jason S Mawlong u la iathuh ba u Myntri Rangbah u la ong ba un sa khot ka jingialang ban iatai ia kane ka mat iakren. “Kane ka la don mynta ar lai bnai bad ngi shim khia ia kane namar ka dei ka kaba ktah bha ia ki paidbah bad na ka liang jong ngi, ngi la ai jingmut kumno ban weng ia ki jingeh”, u la ong.

U Hamletson Dohling, MLA na Mylliem u la iathuh ba ha Constituency jong u mynshwa poi tang 600 ne 700 mynta poi 7000 8000 ka bai thang bor ding elektrik. “Nga la thoh sha u Myntri ka tnad bor ding bad kumjuh sha ophis CMD. Kane ka kam kaba ktah ia ki paidbah bad ngi donkam ban ai jingshisha halor kane ka jingkiew ka bai thang bor ding bad ngin phah ia kita”, u la ong.

Na ka liang u Bah Gavin M Mylliem, MLA ka Sohra u la ong ba jingjia kam dei tang ha Sohra Constituency hynrei ka dei ka mat ia kren kaba khia kaba ktah ia ki paidbah ha ka Jylla. “Ngi hap rah ha khmat u Myntri bad bun na ki paidbah jong ngi ki iathuh ba ka bai thang bor ding ka kiew da ki hajar. Ka long ka jingeh ha kum kane ka por na ka daw ka jingbym biang ka kamai kajih”, u la ong.

Na ka liang ka Party ha kawei pat ka liang la la pynpaw ba kan thoh ruh lada donkam sha ka tnad Home Affairs ban dawa pynkloi ban pynrung noh ia ka Ktien Khasi ha ka Khyrnit ba Phra ka Riti Synshar ka Ri India. “Kum ka Party ka kyntu ia ki MP Lok Sabha bad Rajya Sabha ban kren ia kane ka bynta ha ki Ïing Dorbar Thawain ba ki mih khmat”, la ong u Bah Banteidor Lyngdoh.