Ba kiew stet u COVID, leit kynduh DC ki Rangbah Shnong

Shillong, Nailur 28 : Ka Synjuk ki 6 shnong ba kynthup ia ka Mawkhar, Wahingdoh, Riatsamthiah, Umsohsun, Mission Compound bad Wahthapbroo ha ka jingkynduh ia ka DC jong ka East Khasi Hills hynne ka sngi ki la pynpaw ba kam dei satia kaba suk ban sumar ha iing ia kiba pang COVID.

Katei ka jingpynpaw jong ki kadei hadien ka jingnang kiew ki briew kiba ioh COVID ha ka jylla kaba la pynkhuslai ia baroh hangno yn sumar ia ki lada jia ba ki hospital bad ki Corona Care Centre ki la dap lut.

Shwa kane ki la kyntu ruh ia ka DC ba lada jia ba don kino kino ki jingjia ba don kiba ioh pang COVID ha ki shnong ka dei ban phah pyntip da ka lynti kaba dei lyngba ki Zonal Magistrate khnang ban pynsuk ia ki nongialam shnong ban leh ia kaba donkam.

Ha kajuh ka por pat ka Lympung ka la ai jingmut ruh ia ka sorkar lyngba ka DC ba na ka daw ka jingkiew u Covid ha ka jylla ki la sngewdei ban kyntu ban shna noh da ka Out Patient Department lane ka jaka ai dawai kaba paka ha Barik ka jaka ba ka sorkar ka thmu ban shna ia ka Park khnang ba ki paidbah kin ym donkam ban da rung shuh shaduh Civil Hospital.

Ha kawei pat ka liang ka Lympung lyngba u Rangbah Shnong ka Umsohsun, Bah Paul Sawian u la iathuh ruh ba ki kyrshan ia ka rai jong ka sorkar jylla ban pynlong ia ka Khyndailad bad Motphran kum ki jaka bym shah die madan.