Ba pyrshah ïa ka jingtyrwa ai Work Permit ka sorkar MDA sha ki nong Bangladesh

Mih jyndat ki MLA ka Congress na ïingdorbar

Shillong, Ïaïong 12: Ki nongmihkhmat ka liang pyrshah kiba na ka seng Congress mynta ka sngi ki la pynrem jur ïa la sorkar MDA kaba lamkhmat da ka NPP hapoh ka jingïalam u Conrad K Sangma haba ïadei bad ka mat jong ka jingthmu ban ai ‘Work Permit’ ïa ki nong Bangladesh kaba la pynlong ïa ki ruh ban mih jyndat na ka jaka long dorbar.

Ka jingpynrem jong ki nongmihkhmat ka seng Congress haba ïadei bad ka jingthmu ka sorkar MDA kadei ha ka por ba wanrah ïa ka jingïatai kaba lyngkot ha kaba ïadei bad ka khubor thmu ai ‘Work Permit’ ka sorkar ïa ki nong Bangladesh kaba la wanrah da ka MLA ka East Shillong, kong Ampareen Lyngdoh, MLA ka Mawsynram bah Hima Shangpliang bad MLA ka Umroi bah George Lyngdoh.

Ka jingmih noh jong ki MLA ka Congress hapoh ka jingïalam jong u Dr Mukul Sangma ka la neh kumba katto katne sekhon mar ïa dep jubab u Myntri Rangbah u Conrad K Sangma halor ka jingmut ka Work Permit.

Ka kong Ampareen ka la buh ka jingkylli hato ka jingai work permit sha ki nong Bangladesh  kan ïaid lyngba ka sorkar jylla ba ka la ong ruh ba kumno yn ïatai haba ïadei bad ka work permit sha ki nong Bangladeshi haba ka dang don ka kynrum kynram bad ka Inter-State Migrant workmen (Regulation of employment and conditions of service) Act, 1979.

Ka la buh ruh ak jingkylli na ka sorkar jylla ba ha kino ki jaka ba ki nong Bangladesh kin ioh kam lada ai work permit ïa ki. Ka la pynsngew ba kane ka mat, la dei ban ïatai shuwa hapoh ka Jylla shuwa ban leit tyrwa sha ka sorkar pdeng.

Katba u MLA ka Mawsynram u Bah Himalaya Shangpliang u la ong ba kumno ka jylla kan tyrwa work permit ia ki bar ri haba tang ki samla lajong ruh ki don ki bym don kam bym don jam.

Kumjuh u MLA ka Umroi u Bah George B Lyngdoh u la ong ba ka jylla Meghalaya ka jur bha ka jingbym ioh kam ki samla kaba long haduh 6.2 percent tam kham palat ia ka jingkhein kaba don ha ka ri baroh kawei 6 percent.

Haba shim bynta halor ka jingiatai halor kane ka phang, u Mukul Sangma u la ong ba kane ka jingmut ban wanrah da ka Work permit na ka bynta ki nong-Bangla kam dei ka jingmut kaba wan na ka NPP ne na ki paralok ka sorkar MDA hynrei kumba la paw, la iohi ba wat u Myntri tnad pohiing ka ri u Kiren Rijiju u la iaroh ia kane bad kumjuh ka myntri iada ka ri ka Sushma Swaraj.

U la ong ba u kwah ban tip la ka dei ka jingmut na ka bynta ban plie lad ia ki briew nabar kumba ka sorkar pdeng ka thmu ban wanrah ia ka jingpylla ia ka Citizenship Act ne kumjuh ia ki briew kiba kylla poiwir ka Arunachal Pradesh.

Ka la buh jingkylli, hato ka sorkar ka la lap ba don ki Bangladesh kiba rung bein sha kane ka jylla, bad haei ki don.

U MLA ka KHNAM u Bah Adelbert Nongrum u la ong ba kane kan ktah jur ia ka jaitbynriew ha kane ka jylla kaba rit paid na ka jingwan ioh buhai shnong ki briew nabar.