Ba rem eh ka bai shong kali kamai, takraiñ u Chairman ka SPB ïa ka tnat Transport

Shillong, Naitung 24: Khyndiat kynta hadien ka jingïalang ka tnad Transport, tnad Pulit bad tnad Planning ba la la lum da u Chairman ka State Planning Board ka Sorkar Jylla, Bah Lambor Malngiang, MLA bad MDC ka Nongkrem, ka la mih bluit ka jingpyntip (Notification) na ka ophis Secretary ka tnad Transport kaba la pyntip ba ka bai shong taxi kamai bad auto rickshaw la pynbeit thymmai biang.

“Ka bai shong taxi kamai ka long 26 tyngka na ka bynta ka 1 kilometre ba nyngkong bad bud pat 13 tyngka na ka kilometre kaba ar ter ter katba ka bai shong taxi kamai ka long 7 tyngka na ka bynta man ka san minit ter ter”, la ong ka jingthoh.

“Ka bai shong Auto rickshaw ka long 14 tyngka na ka bynta ka 1 kilometre ba nyngkong bad bud pat 5 tyngka na ka kilometre kaba ar ter ter katba ka bai shong auto rickshaw ka long 5 tyngka man ka san minit ter ter.

Haba kren ha ki nongthoh khubor hadien ka jingïalang, u Bah Lambor Malngiang u la ong ba u la hap khot kyrkieh ïa ka jingïalang hadien ka jingïoh pdiang ïa ki jingujor ba ki taxi kamai bad auto rickshaw ki shim tam ïa ka dor namar ka jingbym shai ki kyndon shim bai shong kali na ka tnad Transport. “Ngam ong ba ki nongñiah kali kamai ne ki paidbah nongleit nongwan ki bakla hynrei ka dei ka jingbym shai bha ki kyndon”, la ong u Bah Lambor.

“Ka duna ka jingpynshai la ka long ïa ki Synjuk nongñiah kali ne auto rickshaw kamai”, u la ong. Da kaba kdew ba ka la don ka jingeh na ka daw ka lockdown kaba la ktah ïa ki paidbah nongleit nongwan bad ki nongñiah kali kali bad auto kamai kiba im ja da kane ka kam, u la ong, “Ki nongñiah kali ki shem jingeh namar ki hap thep duna ïa ki nongleit nongwan namar ki kyndon ïada COVID-19 bad ki nongleit nongwan pat ki hap siew ar shah ka bai kali”.

“Kumta ngi hap ban shim khia nalor ka jinghiar ka kamai kajih, ki nongshong shnong kiba la hap ban siew ar shah ne lai shah sa ka bai kali na kaba long mynshwa ha kaba leit bylla leit sngi. Ki nongñiah kali kim shai ïa ki kyndon shim bai shong kali namar kam don ka jingpyntip kaba shai sha ki . Ha kane ka kynti ngin hap shim ka jingïatreilang bad ki Dorbar Shnong ban pynshai ïa kane ka bynta kata ban ïada na ka jinglut ksan ha ka bai leit bai wan bad ba ki nongñiah kali kin ym shah kynnoh ba ki khniot beiñ ïa ki paidbah”, u la ong.

U Bah Lambor u la batai ba katkum ki kyndon ïada COVID-19 la shah tang ar ngut ki nongleit nongwan shah ban shong kali kamai. Ka bai kali ha ki san kilometre (lada shong marwei) kan long 26+13+13+13 +13=78 hynrei lada ïa shong ar ngut kan long tang mar 39 tyngka .Ka Notification na ka tnad Transport ka la kdew ba ka jingshim tam bai shong kali ka dei kaba ym ïahap satia bad lada lap ba shim tam bai kali na kaba la buh da ka Sorkar kum kine ki kali bad auto rickshaw kamai kin ngat ha ki kyndon aiñ.

Katkum ka jingthoh naka ophis u Secretary ka tnad Transport, kino kino ki jingujor lah ban phone -: District Transport Officer Jowai-Mobile Number- 9774006050, District Transport Officer East Khasi Hills- Mobile Number-8787561584, District Transport Officer West Khasi Hills- Mobile Number- 8974424800, District Transport Officer East Garo Hills- Mobile Number -7005209232, District Transport Officer West Garo Hills- Mobile Number -7005531765.

District Transport Officer South Garo Hills- Mobile Number- 7005531765, District Transport Officer Ri Bhoi – Mobile Number- 8132005976, District Transport Officer East Jaiñtia Hills – Mobile Number- 8794894079, District Transport Officer SouthWest Khasi Hills – Mobile Number- 7005874963, District Transport Officer North Garo Hills – Mobile Number- 9774273179 bad District Transport Officer South West Garo Hills- Mobile Number- 8787633503.