Ba tei ïing ka Assam: Khot hajir ka KHADC ïa u Syiem Raid Marwet, Mylliem & Hima Nongspung

Shillong, Risaw 20: Ka jingïoh jong ka Assam ban tei ïing ha u pud u sam jong ka Council ha Khanapara bad ruh ïa ka jingkieng ha Balakhawa ka la pynlong ïa ka  KHADC ban khot hajir mardor ia u Syiem ka Raid Marwet, Syiem Mylliem bad ruh ia u Syiem ka Hima Nongspung.

Haba kren bad ki lad pathai khubor u CEM Bah Titos Chyne u la ong, ba mynta na ka Council ki dang ap shwa ïa ka jubab na kitei ki nongsynshar Hima shwa ba kin ïaid shakhmat ïa ka kam.

“Ha Khanapara ka Assam ka la wan ban kyntur pud bad tei da ka ïing ba lai mala ba la tip kum ka transit camp jong ki pulit Assam,” ong u CEM.

Shuh shuh u ong ruh ba halor kane mardor ki la pan jingpynshai na u Syiem ka Raid Marwet bad ruh na u Syiem Mylliem.

Haba ïadei pat bad ka jingshna jingkieng ha Balakhawa u CEM u la ïathuh ba mynshwa ma Assam ka la sangeh ïa ka jingpyntrei hynrei mynta ki la sdang biang ban trei. Halor kane ruh ka Council ka la khot hajir ïa u Acting Syiem ka Hima Nongspung.