Bam duh ka ding haduh saw tylli ki ïing ha MeECL Sweeper Colony

Nongpoh, Lber 19: Kumba saw tylli eiei ki longïing hynne ka sngi ki la shah bam duh noh ha ka jingpluh ding kaba shyrkhei bha bad kaba la klang bha na ka daw jong ka jingbthei jong kawei ka cylinder gas kaba la pyndonkam ha kawei na kitei ki ïing.

Kane ka jingjia ka la jia ha ka por 12 shiteng eiei ha MeECL Sweeper Colony, Block VI jong ka MIDC kaba hap hapoh Umiam, Ri Bhoi District.

Katkum ka khubor ba la iohlum, la iathuh, ba watla ki thylliej ding kiba shyrkhei kiba la ioh ban bam duh syndon ia kitei ki saw tylli ki iing, hynrei donbok pat, ba ha kane ka jingjia ym shem la don kano kano ka jingjia kaba sngewsih ha kaba ym shem la don kano kano ka khubor halor ka jingiap briew ne ka jingmynsaw jong ki briew kiba don ha kitei ki ing.

La ioh jingtip ruh, ba ka jinglah kloi jong ki bor pulit bad ki bor pulit pynlip ding sha kane ka jaka, ba la lah pat ban tem noh ia ka ding bad ruh ban iada noh pat ruh ia ka jingpur jong ki thylliej ding sha kiwei kiwei ki jaka kiba don marjan bad kane jaka.

Kat haduh ba la thoh ia kane ka khubor, hadien kane ka jingjia ym pat shym la ioh khein satia ia ka jingduhnong bad jinglut jingsep jong ki trai ing na katei ka jingbamduh jong ding.