Ban ïada & pynneh mariang: 100 klur yn phah bei ka sorkar MDA ha ka World Bank

Shillong, Lber 25: U Myntri Rangbah ka jylla, u Conrad K. Sangma ha ka sngi kut taïew u la pyntip paidbah, ba ka sorkar kaba don hapoh ka jingïalam jong u bad kaba dei ka sorkar synrop – ka sorkar MDA kan ïasoi ïa ka jingiateh soskular bad ka World Bank ha ka jingthmu ban ïada bad pynneh pynsah ïa ki jaka khlaw kiba don ia ki tyllong umbam umdih hapoh ka jylla.

Haba ai jingkren kum u kongsan ha ka ha ka ” Natural Resources Management and Climate Change- Opportunities and challenges for entrepreneurs in Garo Hills” kaba la long ha Dikki Bandi Stadium, Tura, u Conrad u la ong, kane ka jingïateh soskular bad ka World Bank kan dei bad ka jingbei tyngka kaba T. 100 klur.

U la ong, ka sorkar ka ladep ban ïohi jngai khamtam bad ka jingktah jong ka ‘ global warming’ kaba la saphriang ha kylleng ka Ri bad ka pyrthei kumjuh.

Na ka liang u Myntri Rangbah u la ong, “Ka jingkylla ha ka suiñ bneng ka long ka jingshisha bad ka la jia ha India namar ka jingpynjulor ia ki khlaw ki btap, ka jingthang ia ki mar kum u dewiong bad umphniang ( petroleum) ka ialam sha ka jingkiew ha ka jingmih jong ka lyer jaboh ( CO2).”

U Myntri Rangbah u la pynpaw ruh ïa ka jingsngewkhia halor ka jingtyrkhong kloi jong ki tyllong um hapoh ka jylla bad ka jingkiew ha ka jingshit katba nang mih ki snem.

Kumta, kum ka lad ban pynneh pynsah ïa ki jaka khlaw kiba don ïa ki tyllong umbam umdih, ka sorkar kan sa iasoi ia ka jingiateh soskular bathymmai bad ka World Bank na bynta ka jingbei tyngka kaba T. 100 klur ha kaba yn pyndonkam ban iada bad pynneh pynsah ia kitei ki jaka ha ryngkat ka jingkyrshan na ki Nokma bad ki paidbah.

U Conrad u la ong, kane ka jingiateh yn sa iasoi hapoh shi bnai bad yn kynthup lang ha ka skhim 2018- 19 jong ka jylla.

Shuh shuh, u la ong, ka sorkar kan ai mynsiem ruh ia kawei pa kawei ka longiing hapoh ka jylla ban thung ia ki dieng kumjuh ban sumar ia ki tad haduh ba kin da heh da san bad ban iadon bynta lang bad ka ‘ green campaign’, ” My Life! My Tree.”

U Conrad u la pynbna ruh ba ka sorkar kan sa khmih bniah bha halor ka ‘ non- conventional renewable energy’ ban pynduna ia ka jingmih ka lyer jaboh ( carbon).