Baroh Ki Briew Ki Ïalong Kajuh, Tangba …

Da u Bah Banshan Lyngdoh


Ha kine ki sngi jong u Covid19, bun na ngi ngi la ïa ïoh lad ban shu shong ha la ki ïing ki sem bad pynsyrwa ïa ka por da kaba peit ïa ki ‘video’ bapher bapher khamtam ha ‘YouTube’. Ha kawei ka sien, nga la ïoh lad ban sakhi ïa ka jingkren jong u Samla Wanphrang K Diengdoh, u nongshna jong ka phlim ‘Lorni, the Flâneur’. U Samla Wanphrang u la batai ba ka jingpyndonkam jong u ïa ka kyntien ‘Lorni’ kadei ban pynpaw ba bun na ngi ki nong Shillong, ngi ïa lorni bha, bad ki khubor lorni ki ju pur stet kata katta na kawei ka shnong sha kawei pat. Teng teng ki don ruh ki myn lorni ba bsuh ïa la ki tyndong shkor wat ha ki kam ïing jong kiwei ruh, bad pynsaphriang ïa ki khubor ba bha ne bym sngewtynnad. Namar ba ka nongbah Shillong ka long kaba rit bad ka jingdon ki Khasi ka long kaba kham duna, u la ong ba ka kham ïar ba kino kino ki ‘secret’ (ki jingjia kiba jia ha rieh) kin shah set slong slem, bad suki suki ka jingshisha ne ka hamsaïa ka pur stet bha lyngba ki rmiang shyntur jong ki lorni.

Nga sngew ïahap bha ïa kane ka jingkren ka jong u Samla Wanphrang namar ba bun ki nongrah khubor lorni shane-shatai ki la ïa pynbna ïa ka kyrteng jong uto u nongñiah jong ka kali remdor, ka ‘Jeep Wrangler Rubicon’, kaba la leit ban tynrah ïa kawei ka dukan ha ka por jan shiteng synñia ha Malki dang shen. Tangba bun ruh ki la ïa sait khuid ïa kata. Hynrei kaba sngew lyngngoh ka long ba balei uta u ophisar jong u Myntri Rangbah jong ka jylla, u hap ban tim daka ‘tien sih ïa uwei u nongthoh khubor jong ka nongbah, haba u la buh jingkylli shaphang kane ka jingjia ïa takhuh kali? Ka jingleh jong une u ophisar ka long ka bym ïa hap bad ka kyrdan kaba u bat. Wow ka jingpyni jubor ïa ka bor ba neh shipor! To ngan ym da kren than shaphang kata mo ïoh shah tim sih sa ma nga!

Sa kawei ka jingjia, ha ka jingsngew ka jong nga, kaba la pynthohbria ïa ki ‘riew donbor, ka long ka jingwanphai sha Shillong jong u Myntri u ba ‘test Covid 19 positive’ ha ka Kad Liengsuiñ ha Imphal da ka kali shimet. Nga tharai ka sorkar ka la ïoh ïa kawei ka kabu ksiar ban pyni nuksa ba kam dei kaba peit shi liang khmat hapdeng u ba donbor bad kiba ym don bor. Tangba ka khlem la long kumta. Balei ko uta u Myntri u khlem wanphai da ka kali kit nongpang kum ba shah leh lem kiwei kiwei ki nongpang ‘Covid19’?

Kane ka jingjia ka pyni ba ka tarajur jong ki bor aiñ ka noh beit sha ka liang jong kiba riewspah bad badonbor, bad ha ka imlang-sahlang, ka don beit ka jingpeit shiliang khmat ïa ki briew ba duk bad ba tlot bor. Kum ban shu pynkynmaw, ki nongleit ïathoh sha Khanapara ruh ki la shu lait khlem kano kano ka jingpynsajia.

Ngi ki rangli-juki pat ngi shah peit shiliang khmat beit barabor. Lada dei ki nongdie madan ha ïew, kiba trei kam rit kam ria, ne ki bym don kam don jam. Lada jia ba ngi tynrah ne shah tynrah kali, ki bor pynïaid ki ju pynkyllaiñ baji laiphew jait laiphew rukom. Tangba ngim lah ban leh eiei namar ba ka Ri India ka jong ngi ka bud ïa kata ka ‘parliamentary system of democracy’ lane ka rukom pynïaid sorkar kaba pynkup bor ïa ki paidbah ban jied ïa la ki nongmihkhmat. Ha kiwei ki Ri kiba bud ïa kane ka rukom pynïaid sorkar, ki nongmihkhmat kim ju leh donbor bad pyni bor than namar ba ki paidbah ki ïeng pyrshah lada ki shah leh palat. Tangba ha ka ri jong ngi, bun na kine ki ‘Lei San Snem ki pyndonkam bakla ïa la ka jong ka kyrdan.

Nga tharai kan bha eh lada kane ka sorkar jong une u ‘accidental’ Chief Minister (‘accidental’ namar ba la shu jied kyrpang ïa u da mano re mano ban shimti ïa ka shuki Myntri Rangbah; wat ïa pyrkhat jngai than) ban teh lakam ïa kine kiei kiei baroh.

Ha kawei pat ka liang kaba kham i kordit shuh shuh kadei ka synshar-khadar. Ha ki snem kiba la leit noh, ka jylla jong ngi ka la wanrah ïa ki katto-katne ki rukom treikam kiba kham pher. Ki skhim SRWP bad CRRP lane kita ki ‘MLA scheme’ ki dei ki skhim kiba la pyntreikam nyngkong eh ha ka jylla ka jong ngi da ka sorkar jong u Bah BB Lyngdoh ha u snem 1991. Ïa kane ka rukom treikam la bud nuksa pat da ka Sorkar Pdeng ha ki snem ba kham hadien da kaba pynmih ïa ka MPLADS skhim. Ha u snem 2012 ruh, ka skhim MHIS ba la wanrah da ka sorkar u Dr. Mukul Sangma ka la ïoh jingïaroh bha, bad ïa ka la bud nuksa da ka sorkar jong ka jylla Tamil Nadu ha u 2017, bad hadien da ka sorkar pdeng jong u Narendra Modi ruh kumjuh ha u snem 2019.

Kane ka sorkar ba mynta pat, tharai namar ba ka don bun ki myntri kiba dang khynnah, kam shim pat la wanrah ïa kano kano ka skhim kaba pyrkhat thymmai ban pynjanai ïa ka jingim jong ki nongshong shnong. Wat hapdeng kine ki jingjynjar, ngi dang ïai kyrmen ba ngin ïohi ïa ki sngi kiba phyrnai.

Tangba, da sngap ïa ki khana jong ki lorni bad ki ‘riew ba adkar sharum shaneng kiba tip bha ïaka rukom treikam jong ki bor sorkar, ki ïathuh ba kane ka sorkar ka shu bunkam tang ha ki kam pynjulor ïa ka mariang ban myntoi tang ki katto katne. Ka jingshalan tuh ïa u diewïong ka dang ïaid khlem sangeh, ka jingmih ki karkhana thang diewïong da ki phew tylli ha kine ki ar snem, ka jingot pathar ïa ki dieng ban ‘supply’ sha ki karkhana shna ‘plywood’, bad ka jingpur stet jong ki karkhana tih mawshun ki long kita ki ‘policy’ thymmai ba hakhmat eh jong ka ki bor sorkar. Haba ngi ong ‘ki bor sorkar’ ngim mut tang ïa ki nongmihkhmat, hynrei la kynthup lang ïa ki ophisar ruh kiba ïa suh buit bha khamtam ha ki kam khaïi beaiñ. Dang shen ngi la ïohi ba kawei na ki ‘Assembly Committee’ ka la tangon da kaba tyngeh ïa ki ophisar jong ka ‘State Pollution Control Board’ namar ba ki ophisar ki la leh matlah bad kyllut ha kaba ïadei bad ki kam pynjulor ïa ka mariang. Bun ki kynthoh ruh ba nangne shakhmat kin sa dang bun kita ki ‘private shopping mall’ bad ‘shopping arcade’ ki ban sa dang mih nangne sha khmat khamtam ha ka rilum Garo. Mano ba lah bor ban seng ïa kita mo? Ngam da donkam ban batai bniah than.

Da ïa nujor ïa ka apot jong ngi kiba duk pat, khamtam ha ka por jong kane ka khlam ‘Covid19’, ngi ïohi ba ki nongdie madan bapli, kiba pyndonkam tang kumba lai phut duna ka jaka, ki shah jynrat bad shah ieh beiñ. Katno ngut na ki ki la ïa kit ram? Katno ngut ki khynnah skul bad ‘college’ ki la ïoh lad ban siew bai klas ha ka por kaba biang? Kita ki nongthang dewïong beaiñ kiba pynher ïa ki tdem bih sha ka mariang pat, mano ban jynrat ïa ki kumba shah jynrat ki nongshong madan? Balei ki seng bhalang ki ïa pyrshah tang ïa uta u ‘uranium’ uba dang thiah lyngngai khlem pat don kano kano ka jingpynthut, tangba ym don ba ang wat tang shi kyntien pyrshah ïa kiwei pade ki rukom pynjulor ïa kane ka ‘Ri Baieid Ki Blei’? Shano kito ki nongïalam seng bhalang ba kynshoit ïa ki nong shong ïew bad nongdie madan ban ïa her sha Madan Studen lada don ka jingïakhih, tangba mynta tang shi kyntien ruh kim ïa ang ban ïa khun na ka bynta ka hok ka jong ki?

Ka jingong ba ‘ka jingduk ka dei ka jingtim’ ka long shisha kaba shongsbai haba ngi sakhi ïa kine kiei kiei.

Khatduh ïawai paralok nongpule, nga sngew dei ban ong ba da ïa jied sa ïano ïano ruh ban shong ha ka khet synshar, lada dei ki nongmihkhmat, ki ophisar, ki nongïalam shnong, ne nongïalam seng bhalang, ka jingthoh jong u nongthoh ka Ri Bilat, u George Orwell, kan ïai kit jingmut shiryta. U Orwell u la thoh ha ka kot kaba kyrteng ‘Animal Farm’ kumne, “All men are equal, but some are more equal than others” (Baroh ki briew ki ïalong kajuh, tangba ki don kiba kham tam ban ïa kiwei). Kane ka ïahap bha katkum ka jingïohi bad jingbatai jong ba bun ki lorni.