Bat ka KSU Pynursla bad FKJGP Ri War ïa ki bar jylla ba rung laitlan ha Wahkdait

Shillong, Jylliew 10: Ka KSU Border Area Unit bad KSU Pynursla Unit lem bad u Information Secretary ka FKJGP Riwar Mihngi Circle ki la ioh bat ia kawei ka trok kaba don ia u registration number AS 11 GG 5525 ha ka noh phai sngi balang.

Kane ka trok ka dei kaba wan na Silchar ban wan thied ia ki kwai tyrkhong na shnong Wahkdait.

Ka Seng ka lap ba kine ki nongniah kali ar ngut kim shym la don ia ka Epic Card , ka Car pass ne kino kino ki kot jingpynshisha ba ki la dep iaid lyngba ki test ne ban ioh ia ka Fitness Certificate ban pyntikna ba ki long kiba biang ban wan sha ka jylla lane ba kin pyni ba ki la bud ryntih ia ki kyndon kiba la pynjari ha kum kane ka por ka jingiakhun pyrshah ia ka jingpang COVID-19.

Na ka liang ka Seng ka la ban buh ia ka FIR ha Pynursla Police Station.

Na ka liang ka KSU ka pynrem jur ia ki tnat sorkar ba dei khmih halor ka jingioh rung laitlan ki bar jylla khlem da iaid katkum ki kyndon bala bthah.

“Ngi tip shai ba ia ka leit ka wan na kawei ka Jylla sha kawei pat ym pat shym la pyllait haduh mynta ruh hynrei ngi dap da ka jingsngew lyngngoh ba kumno ki kali kiba wan nabar jylla ki lah ban rung laitlan sha ka jylla jong ngi”, la ong ka Seng ha ka kyrwoh.

“Haba wat para ma ngi ruh ngi hap ban ioh da ka car pass bad ruh haba wat ia ki briew jong ngi kiba nabar jylla ruh ki hap ban iaid lyngba shibun ki test bad ruh ki hap ban shong Quarantine kumba 14 sngi”, la ong shuh shuh ka kyrwoh.

“Kaba kham sngew lyngngoh shuh shuh ka long ba kine ki bar jylla ki don tang mar iwei i slip i ba pyni ba ki la dep test haka 9/6/2020 kiba khlem don kano kano ka muhor na kino kino ki bor ba dei khmih”, la ong u samla Damanbha Ryngksai, Publicity Secretary ka KSU Pynursla Unit ha ka kyrwoh.

Ka Seng ka maham jur ba kan ym ailad ia kino kino kiba wanrah ia ka jingshongsyier hapoh ka jylla la ka dei ia ki riewshimet ne ki nongkhaii khamtam ia ki ba wanrah ia ki briew ne ki kali kiba nabar jylla.

Ka Seng ka kyntu ruh ia ki paitbah bad khamtam eh ia ki Rangbah Shnong jong ka thaiñ ba kin sngewbha ban shimkhia lang halor kane lane ba kin sngewbha ban pyntiplang sha ka Seng lada ki lap kum ia kane ka kam khnang ba wanrah ia ka jingshngaiñ hapoh ka thaiñ bad ha ka Ri Khasi hi baroh kawei.