Buh jingdawa ki 11 seng ban pynkynriah ïa ki ba sah ha Them Metor & dawa pyllait ia kiba shah kem 

Shillong, Jylliew 04 : Da ka jingsngewkhia halor ka jinglong jingman ka nongbah Shillong ha ki saw sngi ba la dep ha kaba ka la mih ka jingiakynad hapdeng ki pulit bad ki paidbah, ki seng bhalang hynne ka sngi ki la shim ia ka rai ban shim da ki sienjam kiba tyngeh lada jia ba ka sorkar ka dang buhteng ban weng ia ki jaitbynriew bym dei riewlum kiba shong ba sah ha Them Metor .

Kane ka rai ka la wan hadien ka jingialang jong ki 11 tylli ki kynhun seng bhalang na Ri Lum Khasi-Jaintia ha Shilllong Club . Ia kane ka jingialang la khot pynlong da ka Hynniewtrep Youths’ Council.  U Bah Robertjune Kharjahrin, President ka HYC u la ong ba na ka liang jong ki hi kin  pyrshang ban ia kynduh bad ia kren shwa bad ki bor sorkar.

“Hynrei lada kim sngap ngin shim da ka lynti ka jingiakhih’, la ong u Bah Robertjune Kharjahrin. U la ong ba kum ka kynhun ki seng bhalang hi kin ym shong kli kti bad kin iakhun tyngeh beit haduh ban da urlong ka jingthmu ba ka sorkar kan pynmih hukum ban weng bad pynkynriah noh ia kine ki jadbynriew reiwlum na Them Metor

U la ong,”Ka shong suk shong sain kan wan hi tang shu weng noh ia kine kiba sah ha Them-motor. Kumta lada ka sorkar ka kwah ia ka jingsuk kadei ban leh noh kham kloi bad ka jingpynjari curfew kan ym dei ka lynti sha ka shong suk shong sain”.

U la iathuh ba hadien ba ka ioh jingtip ba ki tyndong lyer pynsat khmat (tear gas) ba siat da ki pulit ki la poi haduh ki iing sah briew, na ka liang ki 11 seng ki kyntu jur ia ki pulit ba ki dei ban teh lakam khnang ba katei kan ym ktah kylla ia ki paidbah ha ki iing ki sem.

Ki la dawa ruh ia u Syiem ka Hima Mylliem ba u dei ban weng noh ia ka’Pata’ na ka bynta ka Them-motor bad ha kajuh ka por ki kyntu ruh ia ka KHADC ba kam dei ban mushlia hynrei ban treilang halor kane ka bynta khnang ba yn lah ban weng noh kham kloi ia kitei kiba sah hangtei.

Kine ki kynhun seng bhalang ki la dawa ruh ba ka sorkar ka dei ban pyllait noh mardor khlem teh kyndon ia kito ki samla ba shah kem da kaba kam ba bun na kitei kiba ngat ha kti ki pulit kidei kiba iaid lynti, wan thoh eksam, kiba wan bylla bad kiwei kiwei.

Ki la dawa ruh ba ka sorkar kadei ban kem lut ia kiba donkti ban pynmynsaw ia ki lai ngut ki khynnah kynthup ia kito kiba rah bad pyni ia ki wait ki sum.

“Ngi kwah ban kren shai ba kane kam dei ka ishu ban wanrah ia ka jingsngew iapher jaidbynriew hynrei ka jingsei wait bad tiar pynmynsaw kito briew ba sah ha Them-motor bad ka jingwallam ia ki MLA kiwei ki jylla ka dei ka jingthmu ban wanrah jingsngew pher jaidbynriew na katei ka jingshah shoh ki khynnah Khasi,” la ong u President ka HYC.

Na ka liang ki 11 seng ki pynpaw ruh ba ki kwah ba ka jaidbynriew baroh kawei kan tylli halor ka mat jingdawa ban pynkynraih noh ia ki briew kiba sah ha Them-motor. “Ngi la rai ban kyntu ia baroh ki sengbhalang kynthup naduh ka KSU, FKJGP, HNYF bad ki Synjuk ki Rangbah Shnong nalor kiwei kiwei ban tylli lang noh ha ka jingiakhun na ka bynta katei ka ishu.

Kine ki 11 seng ki kynthup naduh ka HYC kaba lamkhmat, nangta ka SSSS, HANM, WKHSU, JSU, JYF, AJSU, WYF, CORP, RBSU bad ka EJNC.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589