COVID-19: ‘Dei ban sei ïa ki sakhi ki sabut kiba biang ïoh ym dei tang ki 41 ngut kiba leit ïingkhawai’

  • Shillongmail
  • July 29, 2020
  • Comments Off on COVID-19: ‘Dei ban sei ïa ki sakhi ki sabut kiba biang ïoh ym dei tang ki 41 ngut kiba leit ïingkhawai’

Shillong, Naitung 29: U MLA & MDC ka Nongkrem Constituency, Bah Lambor Malngiang uba dei ruh u Chairman ka State Planning Board ka Sorkar Jylla, u la pynpaw ka jingartatien ia ka jingdon ki briew kiba la leit sha ka jingkhawai iathoh ha Greenwood Resort, Khanapara bad dawa na ka Sorkar bad dawa ba dei ban ïoh ia ki sakhi sabut kiba biang.

Kum ban shu kdew ba ka la don ka jingkiew ha ka jingiabit jingpang COVID-19 ha nongbah Shillong na ki ba la leit sha ka jingkhawai iathoh shongkurim ha Greenwood Resort ha ka 27 tarik u Naitung.

“Ka jingkiew ka jingiabit jingpang ka long ka jingkylli bad nga kwah ban ong la ka long shisha tang 41 ngut ne ki dang don shuh kiba la leit sha ka jingiathoh”, u la ong haba kren ha ki nongthoh khubor ha Laitkor hadien ka jingialang ai mynsiem ia ki paidbah nongshong ba kim dei ban tieng ia ka jingpang COVID-19.

Da kaba iathuh ba i wei na ki nongshong shnong na ka Constituency jong u iba dei i nongtrei ha kawei na ki iing jong kiba la wan sha ka jingiathoh shong kurim mynta i la ïoh ia kane ka jingpang, u la ong, “Baroh baroh ki ia kren shaphang kita ki 41 ngut ki ba la leit sha ka jingkhawai iathoh shongkurim hynrei nga kwah ban ong la ka long shisha ne em?”.

“Namar lada ngi peit ia ka jingkiew ka jingpang kumba long mynta ngam i dei shuh tang 41 ngut bad nga ban jur ban sei ki sakhi satar ba biang namar katne ka wan jia namar ka dei beit na ka jingiathoh ha Greenwood Resort ha Khanapara. Nga sngew ba dei ban pynpaw beit shai kdar bad ngi dawa ba la kumno ban ïoh ia ki sabut kiba biang khamtam ia ki video clippings ha Greenwood Resort, ki CCTV camera”, u la ong.

“Ki don beit kiba ring video bapher bapher ha ka jingiathoh shong kurim. Nga sngew ban ong ba dei ban sei lut ia ki sakhi sabut ban tip dei shisha 41 ne tip ïoh tam spah ngut”, u la ong. “Katba nang mih ki sngi ka nang kiew bad ka long kaei kaei kaba ngim khmih lynti”, u la ong bad bynrap ba ka long ka jingeh kaba khraw ia ki nongshong shnong ha kaba kin hap sumar set kut ialade khamtam ki dei na ki longïing kiba duna ka ïoh ka kot.

“Kane ka la pynjynjar bad pynshitom jingmut  ia ngi kum ki nongmihkhmat bad ka la pynjynjar ia ngi kum u nongkit nongbah bad ka la pyndik ia ki paidbah nongshong bad ki nongialam shnong ki la duh thiah duh dem”, u la ong. ” Ka la pynjynjar ban ia pyrkhat ia kiwei ki kam ki ba ngi donkam ban pyrkhat ha ka imlang sahlang bad ki la sahkut”, u la ong.

“Kane ka jingwan jong ngi shane (ha Laitkor) ryngkat u Myntri ka tnad ka Koit ka Khiah, u Bah AL Hek, ki ophisar na ka tnad ba kynthup ia u DHS (MI), u Dr Aman Warr ka long ban ai mynsiem. Nga kum u nongialam ngan iai don bad phi ki nongshong shnong ban kyrshan ia phi bad nga khlem shongthait naduh ba sdang ka lockdown bad ngin dang iai trei”, u la ong.

Da kaba kyntu ia ki paidbah ba kin nyn sheptieng hynrei ban ia khun ia kane ka jingpang da ka jingsngewthuh bad jingshemphang, u la ong, ” Nga la pan ruh ba dei ban pynpaw paidbah ia ki kyrteng jong kiba long positive ban ïoh pyntip ha ki shnong ki thaw ban long ka jingïada ia ki nongshong shnong bad ki nongshong shnong kin nang ban kiar. Kam dei ba ibeiñ hynrei ban ia phikir”.

“Nga la phah jingthoh sha u Myntri Rangbah bad sha u Myntri ka tnad ka Koit ka Khiah ba la kumno kumno dang i donkam ban bteng ia ka lockdown ban wad ia ki contact tracing. Kum ha Constituency jong nga la ïoh positive sa uba wan na kawei ka jaka .. u wan ha Lad Smit kaba dei ka iew bah hangto. Hynrei nga kwah ban ban jur ia ki nongshong shnong, bor shnong ban ia treilang namar ym tip shuh mano ba don ne bym don jingpang hynrei ban phikir da ka jingshaniah artad ha u Blei ban jop ia ka jingpang”, la ong une u nongialam.