Covid-19: Ïa kynduh lang ki hospital sorkar bad shimet ha ka nongbah Shillong

Shillong, Nailar 04: Ki la don 14ngut ki briew kiba ioh thymmai ia u COVID -19 ha ka jylla ha ka sngi Baar kaba pynlong ia ka Meghalaya mynta ban don 582ngut ki nongpang katba kiba koit ki la poi baroh 330 ngut.

Haba pynbna ia kane, u Director ka tnad ka Koit ka Khiah, Dr. Aman War u la iathuh ba na kitei ki 15 ngut, tang ha East Khasi Hills ki la don haduh 09 ngut kiba ioh thymmai bad napdeng kitei 02ngut kidei ki shipai, 02 ki BSF, bad 05 ngut ki riewpaidbah.

Ki 06 ngut kiwei pat ki kynthup ia uwei na Ri Bhoi bad 5 ngut na West Garo Hills.

Kumba long mynta, ka East Khasi Hills ka don haduh 473ngut ki nongpang ba kynthup BSF – 189, paidbah – 224 bad shipai – 60 ngut.

Ka West Khasi Hills pat ka don mynta – 05ngut, Ri-Bhoi – 55, West Jaintia Hills – 16, East Jaintia Hills – 17, West Garo Hills – 14, South Garo Hills – 2 ngut.

Ha kane ka sngi ki la don haduh 66ngut kiba koit, kynthup ia ki 54 ngut tang ha East Khasi Hills, kata 39 ngut ki BSF, uwei u shipai bad 14 ngut ki paidbah. Nangta 04ngut ha South West Garo Hills, Ri Bhoi 1 bad West Garo Hills – 07 ngut.

Lada kheinlang baroh, kiba koit ki la don mynta haduh 330 ngut.

Ha kane ka sngi u DHS u la iathuh ba ka.la.don ruh ka jingkynduh lang hapdeng ki hospital bapher bapher kiba don ha ka nongbah ban ia phylliew jingmut khamtam hadien Kato ka jingjia ha Ganesh Das Hospital khnang ba ki jaka sumar kin nang kumno ban tehlakam haba don kum kitei ki jingjia.