COVID-19: Ïohpang 49 ngut, koit noh pat 42 ngut

Shillong, Nailar 26: Ka jylla ha ka sngi Balang ka sakhi ia ka jinghiar kiba ioh ia u khniang jingpang coronavirus bad sakhi ruh ba ka jingdon kiba koit pat ki la nang kiew kylleng ki bynta jong ka jylla kaba pynlong ia ka jylla mynta ban hiar na ka 1178 ngut na kaba don mynin ka sngi sha ka 1168 ngut hynne ka sngi.

Tang hynne ka sngi ki don 49 ngut kiba ioh thymmai ia utei u virus katba kiba koit pat ki la poi haduh 42 ngut.

Na kitei ki 49 ngut kiba ioh thymmai, u Director ka tnad ka Koit ka Khiah, Dr. Aman War u la ong ba 32 ngut ki dei na East Khasi Hills kynthup ia ki 30 ngut ki riew paidbah bad ar ngut ki shipai, nangta 9 ngut na East Garo Hills, 7 ngut na West Garo Hills bad iwei na Ri Bhoi District.

Nalorkata, u iathuh pat ba na ki 42 ngut kiba koit, haduh 32 ngut ki dei na West Garo Hills, 7 ngut na East Khasi Hills bad lai ngut na South West Garo Hills kaba pynlong mynta ia ka jylla ban don haduh 874 ngut kiba koit baroh.

Nalorkata, u iathuh ruh ba ka jingdon ki nongpang ha Ri Bhoi ka la hiar mynta hadien ba haduh 17 ngut ki shipai kiba don ha ka distrik ki la leit phai noh sha Assam.

Kumba long mynta, na ki 1168 ngut ki nongpang COVID kiba don ha ka jylla haduh 822 ngut ki dei na East Khasi Hills ba kynthup ia ki 535 ngut ki paidbah bad 287 ngut ki shipai.

Ka West Garo Hills pat kadei kawei na ki distrik ha rilum Garo kaba bun tam kiba ioh ia utei u virus namar ka don mynta haduh 172 ngut ba kynthup ia ki 102 ngut ki shipai bad 70 ngut ki riew paidbah.

La iathuh ruh ba na ka test na phang (random test) ha ki jaka ba bunj paidbah kum ha Police Bazar, Iewduh bad Anjalee ka jingpoi ki birew ki la nang duna. Katkum ka jingiathuh jong u, ha ka test naphang ba ki pynlong ha kane ka sngi Balang ha Motphran na ki 23 ngut ba ki test baroh ki paw ba ki khlem ioh ia utei u virus.

Ha ka test ha Police Bazar pat ki don tang 2 ngut kiba ioh positive na ki 87 ngut katba ha Anjalee pat kiba ioh ki long 3 ngut na ki 19 ngut kiba shah test. U iathuh ruh ba ha Iewduh kim shym la ioh shuh ban test namar ym don mano mano ruh ba wan ban phah test ialade.

U DHS u la pyntip ruh ba la weng ruh ia ka BSF Umpling bad ia ka Shillong Times na ka thup jong ka containment zone.