COVID-19: Khlad 4 ngut bad kem pang haduh 200 ngut mynta ka sngi

Shillong, Risaw 4: Ka jylla ha ka sngi U Blei ka la sakhi ba ki don haduh 4ngut ki briew kiba khlad na ka daw u khniang COVID nalor ba ki don sa kiwei pat ki jingpang ba ki don.

Kitei kiba khlad ki kynthup ia ka Moshi Dkhar 80snem na Mawbah kaba la khlad noh ha NEIGRIHMS ha ka 02tarik mynta u bnai ha ka por 11.10 baje mynmiet. Kawei pat dei ka Kali Thapa 63 snem na Lapalang ka la khlad noh ha ka por 5.10 bake mynstep ha ka 03 tarik mynta u bnai.

Uwei pat ba khlad ha kane ka sngi dei uba tip kyrteng kum u Elia R Marak 58 MES Shillong u ba la khlad noh ha ka por 2.45 baje mynstep ha ka 03 tarik mynta u bnai.

Kawei pat kaba khlad ha kane ka sngi kadei na Mawsaw, South West Khasi Hills ba la tip kyrteng kum ka Niewsalin Iawphniaw 30 snem kaba don jingshitom ba pait ka pla khun bad ha kane ka jingjia ka la khlad noh ha ka 03tarik por 7 baje mynstep.

Da kitei ki sawngut kiba khlad ka la pynlong ia ka jylla ban don mynta haduh 58 ngut kiba iap na ka daw jong utei u virus.

Ki la don tang 200 ngut kiba ioh ia u khniang COVID 19 mynta ka sngi katba kiba koit pat ki la poi haduh 74ngut.

Haba pynbna ia kane u Director of health services, Dr. Aman War u la iathuh ba tang na East Khasi Hills ki la don haduh 126 ngut kiba ioh thymmai ia Utei u virus bud pat sa ka North Garo Hills 1 ngut, Ri Bhoi 44 ngut, South Garo Hills 1, South West Garo Hills 6 ngut, South West Khasi Hills 2 ngut, West Garo Hills 12ngut bad West Jaintia Hills 8 ngut.

Kumba long mynta kiba pang COVID ki don baroh 2209 ngut.

Na kine tang ka East Khasi Hills ka don haduh 1618ngut kiba pang ,West Khasi Hills – 11 ngut, South West Khasi Hills – 15, Ri Bhoi – 225 ngut, West Jaintia – 38 ngut, East Jaintia Hills – 33 ngut, West Garo Hills – 195ngut, South West Garo Hills – 36, South Garo Hills – 10ngut, East Garo Hills – 14 bad North Garo Hills 24 ngut.

Haba phai pat sha kiba koit, na kitei ki 74 ngut haduh 50 ngut kidei na East Khasi Hills, East Jaintia Hills -8, East Jaintia Hills – 3, North Garo Hills – 4, Ri Bhoi – 02 ngut bad West Garo Hills 10 ngut.

Lada khein kyllum lut kiba koit ka la poi sha ka 4393ngut.