COVID-19: Khlad iwei, 172 ngut kiba koit, 70 ngut kiba ïoh kem pang

Shillong, Risaw 27: Ka jylla ha ka sngi Ba-ar ka la sakhi biang ba ki don haduh 172 ngut ki briew kiba koit na u COVID kaba pynlong ïa ka jylla mynta ban don haduh 7643 ngut kiba la koit baroh.

Ha kane kajuh ka sngi pat la sakhi ba ka jingdon ki briew kiba dang ioh ia utei u virus ki la sdang ban hiar namar ki la don sa tang 70 ngut kaba pynlong ia ka jylla mynta ban don sa tang 1411 ngut kiba dang pang.

Haba phai sha kitei kiba koit hynne ka sngi, haduh 100 ngut kidei na na East Khasi Hills, 41 ngut na Ri Bhoi, 16 ngut na West Garo Hills, 06 ngut na East Garo Hills, 03 ngut na North Garo Hills bad South Garo Hills, 02 ngut na West Jaintia bad 01 na West Khasi Hills.

Katba kiba dang ioh thymmai ia utei u virus ki kynthup ia ki 41 ngut na East Khasi Hills, 14 ngut na West Garo Hills,  mar 05 ngut na East Jaintia,  South Garo Hills bad na West Jaintia Hills.

Ha kane ka sngi la don ruh sa iwei i nongpang na East Khasi Hills iba khlad na ka daw jong u COVID-19.

Lah ban kdew ruh  hagne ba ka jingdon ki briew kiba iap na ka daw jong u COVID nalor kiwei kiwei ki jingpang ba ki don ka la poi mynta sha ka 82 ngut ngut.