COVID-19: Khlad sa uwei, 88 ngut kiba ïoh pang mynta ka sngi

Shillong, Nailer 6: Sa uwei pat u rangbah u la khlad noh na ka daw ka jingpang COVID kaba pynlong ia ka jylla mynta ban don haduh 16 ngut ki brie4w kiba iap na ka jingioh ia utei u khniang jingpang.

Ha kajuh ka por ki la don haduh 88 ngut ki briew kiba dang ioh thymmai ia u COVID-19 ha kane ka sngi U Blei kaba pynlong ia ka jylla mynta ban don haduh 1433 ngut ki nongpang ha baroh kawei ka jylla.

Katkum ka kyrwoh na u Director ka tnad ka Koit ka Khiah, Dr. Aman War sa uwei pat u rangbah ba tip kyrteng kum u Dinabandhu Roy, 59 snem ka rta u la khlad noh ha kane ka sngi por 1:54 PM mynsngi. Ia utei u rangbah na ka shnong Pynthorumkhrah ba la rah sha Nazareth Hospital hynne ka step u dei uba don ia ka jingpang shini (Diabetes Mellitus ryngkat bad ka jingpang COVID-19.

Na kitei ki 88 ngut, 35 ngut kidei na East Khasi Hills, 1 na Ri Bhoi, 4ngut na North Garo Hills, 04 ngut na South Garo Hills, 39 ngut na West Garo Hills, 3 ngut na East Jaiñtia, 1 na West Jaintia bad 1 na South West Garo Hills.

Ha kane ka sngi la iathuh ruh ba ki don pat haduh 29 ngut kiba koit, kata kynthup ia ki 4 ngut East Khasi Hills, 11 na South Garo Hills, 4 ngut na Ri Bhoi bad 10 ngut na West Garo Hills.

Kumba long haduh kane ka sngi, kiba koit baroh ki la poi sha ka 1556 ngut kaba pyni ba ka jingdon kiba koit ka la nang bun lada nujor bad ka jingdon ki nongpang.