COVID-19: Khlad uwei, 111 ngut kiba shitom mynta ka sngi

Shillong, Risaw 5: Ka jylla Meghalaya ha ka sngi Nyngkong ka la sakhi biang ba sa uwei u  ba khlad na u COVID kaba pynlong ia ka jylla ban poi mynta haduh 59 ngut kiba khlad.

Ha kane kajuh ka sngi ki la don haduh 111 ngut kiba ioh ia utei u virus katba kiba koit pat ki la don haduh 98 ngut.

Haba kren  bad ki lad pathai khubor, u Director of Health Services (MI), Dr. Aman War u la pyntip ba utei ba khlad dei ba la tip kyrteng kum u Manoranjan Deb 55 snem na Mawbah,

Shillong ba la khlad noh ha ka por 4.38 baje janmiet ha ka 04 tarik mynta u bnai ha NEIGRIHMS Hospital.

Ha kajuh ka por, na ki 111 ngut kiba ioh thymmai ia utei u virus ki kynthup ia ki 72 ngut na East Khasi Hills bud sa ki 19 ngut na Ri Bhoi, 10 ngut na East Jaintia Hills,  West Garo Hills – 06 ngut, West Jaintia – 2, South West Khasi Hills -1, bad South West Garo Hills ruh iwei.

Ha kane ka sngi la pynkynriah ruh haduh 37 ngut ki shipai na East Khasi Hills sha Ri Bhoi District.

Kumba long mynta ka Meghalaya ka don haduh 2270 ngut kiba pang ha kylleng ki  bynta ka jylla.

Ki 98 ngut kiba koit hynne ka sngi ki kynthup ia ki 82 na East Khasi Hills, 7  ngut na Ri-Bhoi, West Garo Hills 3ngut,  North Garo Hills san ngut, West Khasi Hills 01 bad East Jaintia Hills 5 ngut.

Ka jingdon kiba koit pat mynta ka la poi sha ki 4491 ngut ha baroh kawei ka jylla.

Lada shim kyllum na kiba pang COVID ha baroh kawei ka jylla, ka East Khasi Hills kadei kaba bun eh ki nongpang da ki 1566 ngut, West Khasi Hills – 10, South West Khasi Hills – 16, Ri Bhoi – 274, West Jaintia – 30 ngut, East Jaintia – 38 ngut, West Garo Hills – 198 ngut, South West Garo Hills – 37 ngut, South Garo Hills-10, East Garo Hills – 14 bad North Garo Hills – 24 ngut.