Dawa ka KJDSTA ban pynjlan ïa ka eksamin final jong ka SSLC bad HSSLC

Shillong, Naiwieng 4: Ka Khasi Jaintia Deficit School Teacher’s Association hynne ka sngi ki la leit ban kynduh ia u Principal Secretary ka tnad Education ka sorkar jylla, Bah DP Wahlang ban  ai jingmut ia ka tnad Education  ba kadei ban pynjlan ia ka exam final na ka bynta ka Secondary School Leaving Certificate kumjuh ruh na ka bynta ki Higher Secondary School Leaving Certificate.

“Ha katei ka jingiakynduh, ngi la pynpaw ba ia ka exam SSLC bad HSSLC dei ban pynjlan noh haduh u Jymmang la shem snem (2021) khnang ba kan long salonsar lang bad kiwei pat ki eksam kiba long ha ka ri baroh kawei kynthup naduh ki Central Board exam,” la ong u Bah Kular Khongjirem ahba kren bad ki nongthoh khubor hadien ka jingialang bad utei u heh sorkar.

U ong ruh ba ka KJDSTA ka tyrwa ruh ba ia ka selection test na bynta ki private candidate ym dei shuh ban pynlong hynrei ban ailad ia ki ba kin iakhun ia ka exam final.


Ka KJDSTA ka la ruh ia ka phang kaba iadei bad ka jingplie ia ki skul ha kaba ki la pynpaw ba katei ka shong ha ka sorkar ban rai da kaba buh hakhmat ia ka jingshngaiñ jong ki khynnah skul. “Ka jingphah plie biang ia ki skul ka shong haka jingstad jong ka sorkar da kaba phylliew jingmut lang bad ka  Health Department,” u la ong.


Kiwei pat ki jingai jingmut ki kynthup ruh ba ia ki klas naduh klas 9 shapoh dei ban pynkiew klas beit khlem da pynlong ia ki eksam kut snem kumba ju long ha ki snem ba la dep.


Katkum ka jingiathuh da utei u nonghikai, ka tnad pule puthi ryngkat ka MBoSE kin kynduh lang mynta ka sngi, 05tarik Naiwieng ban ia kren halor kitei ki jingai jingmut kaba wan na ki nonghikai.