Dawa pynshitom ka Women’s Empowerment Committee ka ïingdorbar ïa ki doktor, nos ka Ganesh Das

  • Shillongmail
  • July 30, 2020
  • Comments Off on Dawa pynshitom ka Women’s Empowerment Committee ka ïingdorbar ïa ki doktor, nos ka Ganesh Das

Shillong, Naitung : Ka jingiap jong i khunlung ha Ganesh Das Hospital dang shen ka la pynlong ia ka Women’s Empowerment jong ka Iing Dorbar Thawain ka Jylla ban tuklar lang mardor da kaba kynnoh ba katei kam dei shuh ka jingjia kaba nyngkong hynrei kadei kaba la jia teng ruh ha ki khyndiat snem ba la dep.

Halor kane, u Bah HM Shangpliang MLA bad dkhot jong ka Women’s Committee u la ong ba kum ka Committee hi ki pynrem jur halor katei ka jingjia kaba sngewsih kaba kawei ka longkmie ba armet na ka shnong Mawtawar ka la duh ei ia la i jong i khun ba dang shu kha.

U la ong ruh ba na ka Committee kin sa thoh ruh sha ka sorkar ba kadei ban ai lang ia ka kaiphod tohkit ba ki thung ban lap ia ka daw kaba poi haduh u pud ba katei ka longkmie kam shym la ioh ban rung sha katei ka jaka sumar ha ka por ba ka wan nyngkong.

Shuh shuh u ong ruh ba ka sorkar kadei ban pynshitom ia ki doktor, ki nurse ki bym shym la shim ia ka jingkitkhlieh halor kane ka bynta. “Ngi tip ba kane ka longkmie ka wan na ka containment zone na Mawtawar hynrei ym shym don hangno hangno ban kdew ba ki briew kiba wan na kitei ki jaka ban ym pdiang ha ki hospital. Hangno don kum kata ka jingbthah,” la bynrap biang u Bah Shangpliang

Ha kajuh ka por u la ong ruh ba na ka Committee kin sa pan ia ka report jong katei ka jingtohkit na ka sorkar khnang ban tip ia ka jubab na ki bor hospital halor katei ka jingjia.

Lah ban kdew hangne, dang shen katei ka longkmie na Mawtawar ka la hap ban leit phai noh shaiing hadien ba ki bor pyniaid jong ka hospital ki la pyntip ba ym don jingthiah shuh ha Isolation Ward. Hynrei hadien katto katne por da ka jingtuklar jong ka HYC bad da ka jingshimkhia jong u DHS, Dr. Aman War la phah wan biang ia ka sha Hospital. Hynrei tang ha ka por janmiet katei ka longkmie ka la kha noh tangba i khunlung jong ka i la khlad noh.