Dei ka jingsnohkti jong ki ophisar, paidbah ba sa urlong ki kam pynroi: Metbah

Shillong, Nailar 17: U nongmihkhmat ka Mairang konstitwensi sha ka ïingdorbar thawaiñ ka Jylla, u bah Metbah Lyngdoh mynta ka sngi u la ong, khlem ka jingsnohkti jong ki ophisar bad ki paidbah, ki jingpyntrei ïa ki kam pynroi hapoh ka konstitwensi kin nym urlong da lei lei.

Haba ai jingkren ha ka sngi plié ïa artylli ki surok ha katei ka konstitwensi – ka surok kaba 1.60 km ha ka shnong Mawphanñiew bad ka 0.450 km na Nongkhlaw sha ka skul Presbyterian kaba don ha katei ka thaiñ, u bah Metbah u ong, ka jingsnohkti jong ki ophisar bad ki paidbah ka ai ka jingkyrshan ïa nga kum u nongmihkhmat ka long ka jingmyntoi.

“Khlem ka jingïatreilang jong ki ophisar bad ki paidbah, ki kam pynroi hapoh ka konstitwensi kin nym urlong da lei lei,” ong u bah Metbah uba long ruh u Lamphang ka ïingdorbar thawaiñ.

U bah Metbah u la phla ruh ba ha ki 12 tylli ki snem kaba nga don bad ki paidbah ka Mairang kum u nongmihkhmat, nga ïohi ïa kiba bun ki jingeh bad nga sngewthuh ruh ïa ki jingdonkam jongphi kum ka surok bad kiwei kiwei ki kam pynroi.

“Kumta, marwei ngan nym lah ban trei khlem ka jingsnohkti jong ki ophisar, ka jingkyrshan ki paidbah, naka bynta ki kam pynroi jong ka konstitwesni,” la ong u MLA ka Mairang.

U MLA ka Mairang u ong, ka konstitwensi ha kito ki por ka don bun ki jingduna, bad lyngba ki jingïatreilang bad ki ophisar bad ki paidbah ngi la lah ban ïoh ïa kiba bun ki skhim naka bynta ban weng ïa kiba bun ki jingeh jong u paidbah.

Kitei ki artylli ki surok kidei kiba la shna ha ka jinglut kaba 2.9 klur tyngka.

Ha kajuh ka sngi ruh u Lamphang ka ïingdorbar u la pynkup burom ïa u samla Regan M Nongrang uba na katei ka thaiñ bad uba la poi ha ka position kaba 18 jong ka eksamin matrik.

Haba ai jingkren u bah Metbah u la ong, kane ka jingjop kadei ka jingsdang ha ka jingïaid lynti naka bynta ka lawei namar kam dei ka jingkut.

Ha katei ka sngi kiba la ïadon ryngkat ki kynthup ïa u joint director ka tnat pule puthi u bah M. Marbaniang, u bah A. Nongbri SDO Mairang Civil Sub Division, u BDO ka Mairang C&RD bah Swer, ki ophisar na ka tnat PWD, ki nongkitkam Shnong, ki nongpyniaid jong ka skul Presbyterian Mawphanñiew bad kiwei kiwei.