Ha u Nohprah 2021 – K’Lyngkot 2022 yn pyndep ïa ka Assembly ba thymmai jong ka Meghalaya : Metbah

  • Shillongmail
  • June 23, 2020
  • Comments Off on Ha u Nohprah 2021 – K’Lyngkot 2022 yn pyndep ïa ka Assembly ba thymmai jong ka Meghalaya : Metbah

Shillong, Jylliew 23 : U Lamphang jong ka Ïing Dorbar Thawaiñ ka jylla, Bah Metbah Lyngdoh u la ïathuh ba ka jingtei ïa ka Iing Dorbar ba thymmai jong ka Jylla ha Mawdiangdiang, New Shillong Township yn pyndep noh hapoh ka por ba la buh.

U Lamphang, ha ka sngi Hatmajai u la leit ban jurip ïa katei ka jingpyntrei ïa katei ka Ïing Dorbar bad u la lum ruh ïa ka review meeting bad ki heh sorkar na ki tnad bapher bapher jong ka sorkar jylla.

Haba kren hadien ka jingïalang, u Bah Metbah u la ong, “Ka jingtei pyndep ïa ka Ïing Dorbar ka dei ban long ha shwa ka por ba la buh. Ngi kwah ruh ban pyndep ïa ka jingtei la kumno kumno ha u Nohprah 2021 bad Kyllalyngkot 2022.”  

Shuh shuh u la pynpaw ruh ba katei ka projek kan ym duh kano kano ka jingkyrduh pisa. “Nga sngewkmen ba u Myntri Rangbah ka Jylla ruh u la kular ban peit kyrpang haba ïadei bad ka jingshna ïa katei ka iing ba thymmai.”

U Lamphang u la kdew ruh ba katei ka jingtei kan long ka burom bad ka jingsarong ïa ka jylla ynda la lah ban pyndep pura ïa ka.

U Bah Metbah u la bynrap ruh ba naduh ba shna ïa katei ka jingtei, ki la don bun ki jingeh kiba mih na ka por sha ka por hynrei u pynpaw pat ïa ka jingsngewkmen namar ka don ka jingïatreilang bad ka jingkitkhlieh ba la shim da ki ophisar jong baroh ki tnad sorkar.

Ka jingpyntrei ïa katei ka Iing Dorbar jong ka jylla la shimti da ka kompeni na Uttar Pradesh ba la tip kum ka  Rajkiya Nirman Nigam Ltd kaba la sdang ïa ka kam naduh u Jylliew jong u snem ba la dep. Hynrei na ka daw ka jingphriang noh u COVID -19, la hap ban pynsangeh noh ïa ka kam na ka bynta ar bnai hynrei la sdang biang pat ha u Jymmang.