Hadien u myntri ka tnat bording, ïohkem pang COVID-19 sa u myntri ka tnat ka koit ka khiah

Shillong, Risaw 25: Ka jylla ka sakhi sa uwei pat u Myntri sorkar ban ïoh ïa u khniang jingpang COVID-19 hadien ba la wan phai na ka jingleit kynduh ia ki myntri ka sorkar pdeng ha Delhi, nangta u la leit ruh sha Haryana kumjuh ha Guwahati shwa ban wanphai.

Utei u Myntri ba dang shu ïoh thymmai ia utei u virus u dei u Myntri ka Koit ka Khiah, Bah AL Hek uba dang shu wan phai na Delhi ha ka sngi Nyngkong.

Katkum ka jingïathuh ki bahaïing, tang ha ka sngi Ba-ar la test ïa u da ka CB Nat bad hynne ka sngi la lap ba u ïoh ïa utei u virus. 

Haba ioh ban ïa kren bad u Myntri, u la ïathuh ba naduh ba u wan u la set slung ïalade ha la ïing ha RR Colony bad u don ruh ha ka met kaba shait ba khlaiñ.

Lah ban kdew hangne ba hadien u Myntri ka tnad Bording, Bah James K Sangma, u Bah Hek u dei u Myntri sorkar uba ar ban ioh ia utei u virus ha ka jylla.