Haduh 45 minit pynap u MLA ka Ranikor ïa u Symbud Lamphang ka ïingdorbar thawaiñ

Aiti shithi iehnohkam ha u James Sangma ym ha u Timothy Shira

Shillong, Jylliew 21: U MLA ka Ranikor u bah Martin M Danggo uba la mut ban iehnohkam na jinglong nongmihkhmat sha ka ïingdorbar thawaiñ hynne ka sngi u la shu pynsah ha umdum ïa kiba bun kynthup ïa u symbud Lamphang, u Timothy D Shira bad ïa ki nongtrei ka ïingdorbar thawaiñ kaba don ha Khyndailad.

U bah Danggo u la buh ïa baroh kiba don ha katei ka jaka ha ka umdum kynthup lang ïa ki nongthoh khubor kiba don ban sakhi ïa ka jingthmu ban aiti ka jong u ïa ka shithi iehnohkam kum u MLA, kadei namar u khlem wan poi satia wat hadien ba la ap haduh shi kynta duna kata naduh 5 baje janmiet haduh kumba 6 baje duna.

Kaba kongsan kaba la buh ha ka umdum kadei ïa u Timothy D Shira namar wat haba u la rai ban nym wan shuh hynrei u khlem pyntip pat ïano ïano wat ïa ki ophisar jong ka ïingdorbar.

Hashuwa kane, la ioh jingtip ba u bah Danggo u la pyntip ba un poi sha ka ophis u symbud Lamphang kaba don ha Khyndailad ha ka por 5 baje janmiet ban wan aiti ïa ka shithi iehnohkam.

Katba u symbud Lamphang, ki ophisar ka ïingdorbar thawaiñ bad ki nongthoh khubor ki dang ap kata la palat shiteng kynta, la shu ïoh khubor ba u bah Danggo um thikna shuh ban wan.

Mar kumta, haba pyrshang ban ïoh ban ïakren bad u bah Danggo ha ka hynrei ka khlem long satia namar ka jong u ladep ban pynlip.

Kumta, ki nongthoh khubor ki la leit ban kynduh ïa u symbud Lamphang bad u la ïathuh, ba u bah Danggo um thikna shuh ban wan na ka daw bym lah kiar.

U Timothy Shira u la ong pat, ba u la shu ïoh khubor ba ha ka taïew ban wan, u MLA ka Ranikor un sa wan ban aiti ïa ka shithi iehnohkam hynrei ym tip pat ïa ka sngi bad ka por.

Hynrei, ka tyllong khubor pat ka la pyntip ba hadien kumba 9 baje mynmiet, u bah Danggo u la leit ban aiti ïa shithi iehnohkam ha u myntri ka tnat kam pohiing, u James Sangma.

Haba ioh ban ïakren bad ki ophisar na ka ïingdorbar thawaiñ ki la ong, haduh mynta kim pat don eiei kum kata ka jingtip bad yn nym pat ban ong, ba u bah Danggo u la iehnohkam kum u MLA namar ka shithi kam pat poi sha ka ophis jong ka ïingdorbar.

Ban shu pynkynmaw, dang shen ha ka jingïalang kaba long ha Ranikor, u bah Danggo ha jingdonlang u myntri rangbah ka jylla, Conrad Sangma, u la pynbna ba u la long uba thikna ban iehnohkam kum u MLA jong ka seng Congress lada ka sorkar ka plie noh ïa ka ophis treikam jong ka Ranikor civil sub division.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589