Haduh 605 ngut kiba ïoh Covid ha ka jylla, 18 ngut mynta ka sngi

Shillong, Nailar 02 : Ki la don haduh 18 ngut ki paidbah kiba dang ioh thymmai ia u khniang Coronavirus ha kane ka sngi u Blei hynrei ha kajuh ka por pat ki la don haduh 12 ngut kiba koit, ong u Director ka tnad ka Koit ka Khiah, Dr. Aman War.

Haba kren bad ki lad pathai khubor, u Dr. Aman u la iathuh ba na ki 18ngut, tang na East Khasi Hills ki don haduh 13 ngut, bud la Ri Bhoi da ki 4 ngut, bad East Jaintia iwei.

Ha East Khasi Hills kiba ioh ia Utei u virus ki kynthup ia uwei ba dang wanphai na bar jylla, 3ngut ki shipai, 5 ngut ki BSF, bad saw ngut ki riew paidbah.

Kumba long mynta ka jingdon kiba ioh COVID ka la poi 605 ngut. Tang ha East Khasi Hills ki long – 497 (BSF-213, paidbah – 227 bad shipai – 57), West Khasi Hills – 05, Ri -Bhoi 50, West Jaintia Hills – 14, East Jaintia Hills 17, West Garo Hills 16, South West Garo Hills 04, bad South Garo Hills 02ngut.

Na ki 12ngut kiba koit, baroh kidei na East Khasi Hills ba kynthup ia ki 10ngut ki BSF bad 02ngut ki paidbah kaba pynlong mynta ban don baroh haduh 264 ngut kiba koit.

La iathuh ruh ba na kitei ki 18ngut kiba ioh thymmai uwei dei u doktor ka North Eastern Indira Gandhi Regional Institute of Health and Medical Science.