Haduh 64 tylli ki shnong la pyndep u bah Metbah ban ïalap pyrshah ïa u COVID-19

Shillong, Nailar 26: U nongmihkhmat sha ka ïingdorbar thawaiñ, u bah Metbah Lyngdoh uba la lamkhmat ïa ka jingïalap pyrshah ïa ka khlam Coronavirus ha ka thaiñ Mairang hynne ka sngi u la lah ban pyndep sa ki artylli ki jaka kaba kynthup ïa ka thaiñ Nongthliew bad Laitdom.

Haba kheiñ kyllum ka jinglah jong u bah Metbah uba long ruh u lamphang ka ïingdorbarb thawaiñ ka la poi shaduh 64 tylli ki shnong.

Kum ban shu pyntip u bah Metbah u la sdang ïa kane ka jingïalap ban pynsaphriang ïa ka khubor kumno ban ïakhun ïa u COVID-19 u la sdang naduh u bnai Ïaiong.

Kane ka jingleit ban ïalap bad pynsaphriang ïa ka khubor halor u COVID-19 ka long haryngkat bad ki ophisar kiba na ka Mairang Civil Sub Division kiba kynthup ïa u SDO, bah Alert Nongbri, SDPO bah H. Kharkongor, BDO bah V. Swer bad ki doctor na ki jaka sumar bapher bapher.

Ki jaka kiba u bah Metbah u la pyndep ha ka jingïalap ban saphriang ïa ka khubor kumno ban ïaleh pyrshah ïa ka khlam Corono ne ïa u khniang jingpang COVID-19 ki kynthup ïa ka thaiñ Shilliang Khri kiba don 12 shnong, Shilliang Umtrew 10 shnong, Nongkhlaw 5 shnong, Laitdom 14 bad ka thaiñ Nongthliew kaba don haduh 23 tylli ki shnong.

Kumba la ïalap sha kiwei ki jaka, kumta ha ki artylli ki thaiñ – Nongthliew bad Laitdom kiba u leit ban ai jingkren u bah Metbah u la ong, ka lynti kaba khlaiñ bad ba dei ban ïakhun ïa une u khniang jingpang ka long da ka jinglehkhuid bad ban pdiang ïa ki jingtip ne ki jinghikai kiba ai na ki doktor bad ki tnad Sorkar.

Na ka liang u bah Metbah u la ong ruh ba ïa ka khlam CoVID-19 yn lah ban jop dei tang da kaba ai ia ki jingtip kiba dei.

Ha kajuh ka por, u la ai khublei ïa ki doctor, ki ophisar, ki dorbar shnong bad ki paidbah ka Mairang kiba la trei minot miet bad sngi kumno ban pynlong ïa katei ka thaiñ ba kan lait na ka khlam COVID bad ruh ban ïatreilang ha kiba bun ki liang khamtam haba don bun ki jingeh kiba wan ha manla ki jaka.

Ha katei ka sngi la ïoh ruh ïa ki jinghikai na ki doctor, ki ophisar kiba kynthup ïa u SDO ka Mairang, BDO bad u SDPO.

Na ka liang ki doctor ki la kren halor kumno ban bteng ïa ka jinglehkhuid katba na ki ophisar ki ban halor ban nym pynkheiñ ïa ki jinghikai halor ka jingdeng mask, ka social distancing bad kiwei kiwei.