Hashuwa ban kut u snem 2020, yn plie noh ïa ka Tirot Sing Complex ha Mairang

Shillong, Jylliew 9: Ha kine ki lai bnai kiba la leit, ka jylla bad ka ri hi baroh kawei ka la ïakynduh bun ki jingeh na ka daw jong ka jingpang khlam COVID-19 hynrei kam shym la pynduh mynsiem pat ïa ki katto katne ban pynurlong ïa ka jingangnud jong ki paidbah ban ïoh ïa ka jingmyntoi khamtam ba kidei ki kam pynroi shnong.

Ïa kane la sakhi hynne ka sngi ha ka shnong Mairang ha ka jingleit jurip jong u MLA ka thaiñ uba long ruh u Lamphang ka ïngdorbar thawaiñ, u bah Metbah Lyngdoh ïa ka jingpyntreikam ïa ka Tirot Sing Cmplex kaba ju tip kum ka ïew Langstieh kaba don ha ka shnong Pyndemumïong bad kaba dang ïaid shaid shaid haduh mynta.

Kane ka ïew kadei kaba la bei pisa da ka North Eastern Council (NEC) lyngba ka Ministry of DoNERS jong ka sorkar India bad la mang ban tei ïa katei ka ïew ha ka jinglut kaba kot haduh 12.86 klur tyngka.

Ka ïew Langstieh kadei ka ïew die lang kaba wan baar lada ïa nujor bad ka ïewduh bad kadei ruh ka ïew kaba la ai jingmyntoi bha ïa ki paidbah ka jylla khamtam ba ki ïa ïoh ban khaïi markylliang tang para Khasi.

Ha ka jingleit jurip jong u bah Metbah haryngkat ka jingdonlang u Syiem ka Hima Nongkhlaw, u Paiem Phrester Manik Syiem, SDO Civil bah A. Nongbri, haryngkat ruh ki heh ophisar ka NERCORMP bad kiwei kiwei bad ka la don ruh ka jingïalang kaba lyngkot hapoh katei hi ka jaka.

Haba ai jingkren ha ka jingïalang kaba lyngkot kaba la pynïaid da ki nongpynïaid ka Tirot Sing Market Complex, u bah Metbah u la ong ba u dap da ka jingkmen ba ka don ka jingkut jingmut ba ïa kane ka ïew yn pyndep kumba la buh tarik kata hapoh une snem bad ban plie ha u bnai khatduh jong une u snem.

“Nga dap da ka mynsiem kaba sngewkmen ban ïoh jingtip na ka NERCORMP bad ka KCRMS Nongstoiñ ba ïa ka kam yn pyndep ha ka por kaba la buh,” ong u MLA ka Mairang.

Na ka liang u bah Metbah u la ong, ba u dap da ka jingpyngngoh ba ka jingdon ka jingkhang shnong kam shym la pynthut ïa ka mynsiem jong kine ki kynhun ban trei na ka bynta ka roi ka par bad ka jingkut jingmut ban pynurlong ïa ki kam khlem ka jingsahteng.

U bah Metbah u la ong ba ka jingtrei shitrhem jong ki ophisar ka NEC bad ka Ministry of DoNER kam pynduh jingkyrmen ruh ban dang ïoh shuh shuh ïa ki jingïarap kata na ka bynta ka phase I bad phase II.

U MLA ka Mairang u la ong, lada ka jingïarap ka dang wan shuh shuh, kan long ka jingmyntoi ïa ki nongthied nongpet bad khamtam eh kadei na ka bynta ki nongkhaïi jong ka thaiñ bad ka jylla baroh kawei.

Kiwei kiba la ai jingkren ha katei ka sngi ki kynthup ïa u Paiem ka Hima Nongkhlaw bad ruh ki ophisar na ka NERCORMP.