Hiar jurip u DY CM bad ki Myntri sha Ïewduh, lah ban plie noh shen

Shillong, Jylliew 16: Namar ka jingkyrpad palat ki paidbah ban plie noh ia ka Ïewduh, na ka liang u Symbud Myntri Bah Prestone Tynsong haryngkat u Myntri ka tnad Urban Affairs Bah hamlet Dohling, nangta u Myntri ka Koit ka Khiah Bah AL Hek,  kumjuh u CEM ka KHADC Bah Titos Chyne bad ruh u Syiem ka Hima Mylliem ki la leit ban jurip ia katei ka iew kaba heh tam ha Ri lum Khasi Jaintia.

Haba kren bad ki lad pathai khubor hadien ka jingjurip u Symbud Myntri Rangbah u la ong ba ka sorkar kan sa bishar bniah bha ia katei ka bynta bad lada ki phah plie ruh kin hap ban buh da ki kyndon ba kham pyrkhing ia ki nongdie.

“Ym slem shuh ngin shong ia ka jingialang ban rai halor kane ka Iew. Ngi hap ban pyrkhat lang na ka bynta ka ioh kamai jong ki nongshong iew ruh,” la ong u Symbud Myntri Rangbah.

Katkum ka jingong jong u, ki nongshong iew ki hap ban shim lang ia ka jingkitkhlieh ban sumar dalade ialade khamtam haba ki iew ha Iewduh ki dei najuh hajuh.