Hiar ka ïoh ka kot ki paidbah ka jingkhang noh ïa ka Hat Khappud ha Lyngkhat

Shillong, Ïaïong 13: Ka ioh ka kot ki nongwan iew, ki nongrep, ki nong-khaii ka thain RI War ka la hiar haduh katta katta hadien ka jingshah khang noh ka Iew Khappud ha ka shnong Lyngkhat, Khyrim Syiemship.

Ki paidbah nongwan iew bad ki nong-khaii ki la pynpaw ka jingsngew khia ba ka ioh ka kot jong ki kam long shuh kum ha ki por ba la dep.

Watla kane ka Iew la pynlong da kaba shu ailad na ka liang ki shipai ka Border Security Forces (BSF) ba dei peit sha kane ka thain, pynban wat ha ka por long iew kaba khyndiat eh, ka la kyntiew shibun ia ka ioh ka kot jong ki paidbah.

Kiba wan iew bad wan khaii sha kane ka Iew kaba la ju pynlong khappud ki pynpaw ba ki mar rep jong ki khamtam kiba pyut kloi kim lah shuh ban pyniaid iew bad hap ban shu bret ia ki.

Ki nong-khaii na ki shnong bad ki thain ba marjan kane ka shnong ki iathuh ba ha ka por ba dang plie ia kane ka Iew Khappud ki wanrah ia ki mar khaii jong ki kum u kwai, tympew, ki soh bad kiwei kiwei.

Ki ioh ia ka lad ban ia die ia thied bad ki nong Bangladesh bad ioh ruh kabu ban pyniaid ia ki mar khaii jong ki kiba ym lah die sha kiwei pat ki iew.

“Ngim ioh shuh ka lad ban ia khaii pateng bad ki nong Bangladesh kiba shim ia ki mar khaii ki mar bam kiba ngim lah ban die sha kiwei pat ki jaka iew”, la ong ki nongshong iew ha Lyngkhat.

“Ngim lah ruh ban pynpoi ia ki mar rep jong ngi sha Iew Pynursla ne Shillong namar ki mar rep jong ngi kin ym pynmih shuh ia ka bai kali ne bai leit bai wan”, ki la ong shuh shuh.

Kine ki nongshong iew ki shong die jingdie mynta ha ka Iew Lyngkhat kaba jngai katto katne na ka jaka khappud kaba ki ju ia khaii baroh shi katta bad ki nong Bangladesh watla ka long tang shi kynta ne tam eiei man ka sngi Iew.

“Ngi buh jingkyrpad ia ki bor sorkar ban tuklar lem halor kane ka bynta na ka bynta ka kam kamai jong ngi ha ki bynta khappud”, ki la pynpaw.

Kum ban shu kdew ba ka jing-pynlong iew ha kane ka bynta khappud la pyn-sangeh ha ka 21 tarik u Lber, 2018 bad na ka liang ki bor pyniaid shnong ki la leit ruh ban ia kren bad ki bor sorkar.

U Bah KK Tangsong, Sordar ka Raid Lyngkhat u la ong ba kane ka jingshah pyn-sangeh ka long ka jingduh myntoi na ka bynta ki nong iew, ki nong-khaii bad ki nongshong shnong kiba bun hi ki dei ki nongrep.

“Ki shipai BSF ruh ki shim khia ban peitngor ba kan ym don kano kano ka jingwan rung tuh da ki nong Bangladesh sha Ri India bad ka jingpynlong iew ka long ha khappud khnang ba ki nongwan iew bad ki nong-khaii kin lah ban kynriah kloi la u jong u pud u sam”, la ong u Bah Tangsong.

“Ka jingailad ban pynlong iew ka pynduna ia ka jingwan kiew ki nongtuh kiba wan tuh ia ki mar rep mar riang jong ki paidbah”, u la ong da kaba bynrap ba bun ki longing kiba duk ki lah ban kyrshan ia ka ing ka sem jong ki da kaba ioh lad ban die ia ki mar rep jong ki watla ka long tang khyndiat ruh.

“Ia ka iew la pynlong baroh shi katta tang da ka jingsngew synei ki shipai BSF bad ka jingailad jong ki ka long ban ioh pyniaid ia ki mar kiba lah ban pyut kloi”, u la ong shuh shuh.

“Ka jingkhang ia kane ka iew ka wanrah jingeh ban ia die ia thied bad ban pynmih pisa ia ki paidbah nongshong shnong jong ka thain RI War hi baroh kawei”, u la ong shuh shuh.