Husiar Ho, Nongmihkhmat! Ki Khmat Ki Khmih Ïaphi

Nongthoh: Ferdinand B. Lyngdoh Mawphlang

Ha ka samoi jong ka ilekshon, ha ki bnai ba sdang snem jong u 2018, la bun ki seng riewlum bad riewthor, ryngkat bad ki kyrtong laiphew jait laiphew rukom, ki la khroh pynbiej ïa ki paidbah nongthep vote ba kin jied ïa kita ki ‘rangkynsai-‘rangkynih, ki ban ïasaid naka bynta ki rangli-juki ha ka Dorbar Thawaiñ. Ki la ong ba dei tang ma ki kiba lah shisha ban pynsngew ïa ki jingeh jong ki paidbah; ki ban trei bor bah ban kyntiew ïa ka imlang-sahlang. Bun ki ‘tien jali-jaum ki la khlei bad kular ba lada ki shah jied, kin kynih ha Dorbar Thawaiñ ban ïalam ïa ka jaidbynriew na ka jingdum sha ka jingshai.

Phewse! Da la poi ka por ban pyni ïa ki kam pat, kaei kaba ngi ïohi ha kine ki khyndiat sngi ba la leit noh?

Haba ïa nujor bad ki por ba kham mynshuwa, kawei ka jingïapher ka long ba mynta ka jingïakynduh jong ka Dorbar Thawaiñ ka long ka bym jrong than. Kumba la kren da ka nongmihkhmat jong ka East Shillong, ka Kong Ampareen Lyngdoh, ha shuwa ban sdang ka ‘Re-Assembled Budget Session’ ka ba la neh tang lai sngi, naduh ka 20 haduh ka 22 tarik u Jymmang, 2020, ka la ong, “Ngin ïakren aïu haba ïashong ‘session’ tang lai sngi?” Haba la tih bniah ïa kane, la ïoh jingtip ba ha kane ka kynti, kumba palat 60 tylli ki jingkylli la shu sah khlem ïoh jubab na ka sorkar jylla namar ba lyngkot eh ka por.

Lada ïa nujor pat na ka liang jong ka Kynhun Myntri jong u Pa Conrad Sangma, nga tharai ki myntri ki la ainguh ai dem kyrpang ïa u Blei Kynrad ba ka dorbar ka la kut noh. Lada dei ba ka dang ïai neh bun sngi, nga tharai u Myntri Rangbah u la hap ban patied tyngeh shuh shuh ïa ka ‘electric guitar’ ka jong u man ka janmiet ban pynbyrngia ïalade, bad ban pynjaijai ïa la ka jingmut, kumba u la leh ha ka janmiet ba la kut ka dorbar.

Da sngap ïa ki khana jong ki ba bun ba lang, bad da pule ïa ki ‘comment’ ne jingkynthoh jong ki briew ba pyndonkam ïa ka ‘Facebook’ bad ‘YouTube’, ngi sakhi ba bun bah ki la ïa kren beiñ kren khoh ïa ka rukom ai jubab jong ba bun ki Myntri ïa ki jingkylli ba la buh da ki nongmihkhmat ba don ha ka liang pyrshah ha kane ka kynti.

Da ïa nujor bha, ka dei shisha ka jingkynthoh kaba shong nongrim. Ka jinglehsting bad ka jingbym shimkhia ïa la ka jong ka kam, la sakhi ha ka rukom jubab ka jong ki.

Nyngkong, haba shah kylli ha u Bah SK Sunn, nongmihkhmat jong ka Mawphlang, lada don ne em kita ki ‘incinerator’ ne ki kor ban pynduh ïa ki tiar ba la dep pyndonkam da ki ‘hospital’, ha ka jubab jong u, u Bah AL Hek, Myntri ka koit ka khiah, u la ong ba ka don kawei ka ‘incinerator’ ha Civil Hospital, Shillong. Hadien pat, ka la mih ka jingpynshai na u Myntri Rangbah ba kane ka jubab jong u myntri ka long kaba bakla. U la pynshai ba ka jylla kam don wat tang kawei ka ‘incinerator’ hangno hangno ruh. Kaba lyngoh ka long ba kat u Bah AL Hek, u ba la ih bad la slem bha ha ka kam, kumno um long satia u ba la pynkhreh ban ai jubab ha ka rukom ban pynhun ia ki nongkylli bad nongsngap?

U Myntri Rangbah ïalade ruh, watla u dei uta u ba la pyndep ïa ka jingpule na Wharton University, USA, bad Imperial College, London, uba pnah ban kren ïa ka ktien phareng kumba la ong u Bah HS Shylla, hynrei um lah satia ban jubab shai ïa ka jingkylli jong u Bah Sunn haba u la phah jer kyrteng ïa kita ‘ki 12 tylli ki jaka ba ïakajia pud hapdeng ka jylla Assam bad Meghalaya’. Hato ka ‘Border Issue’ kam long mo kaba donkam ïa kane ka sorkar ka jong u?

U hynmen jong u ruh, u James Sangma, Myntri ba peit ïa ka bam ka dih, u ba pnah ban kren phareng kumba long lem u para, u la kren laplah haba la kylli u Bah HM Shangpliang bad Bah George Lyngdoh halor ki jingdkoh ha ka rukom sam khaw ‘ration’ bad ka jingbymïoh khaw jong ki briew ki bym don ‘ration card’. U myntri James u la ong ba ka sorkar MDA ka la bud ïa ki kyndon thik kumba la bthah ha ka National Food Security Act (NFSA) ha kaba ïadei bad ka rukom sam khaw. U la bynrap ba ka sorkar MDA kam lah ban ‘deviate’ ne ban ïaid lait satia na ki kyndon ba la buh da ka Sorkar Pdeng. U la ong ba ki bym don ‘ration card’, ki hap ban thied khaw na ka ‘open market’ ne ka ïew paidbah.

Ka la mih ka jingïakren kaba kham khluit khyndiat hapdeng u myntri James bad u Bah Shangpliang, hadien ba u nongmihkhmat ka Mawsynram, u la ong ba u myntri ‘u la rah ïa la ki kti shajrong’ da ka jingbym banse ba ka sorkar kam lah satia ban ïarap ïa kita ki rangli bym don ‘ration card’ khamtam ha kane ka por ‘Lockdown’. U la ong ruh ba un hap ban pyntip sha ki paidbah ba u myntri u la jubab ha Dorbar Thawaiñ ba ym lah ban leh eiei na ka bynta jong ki.

Ïa kine ki jingjia ha Dorbar Thawaiñ, ngi la ïohi lyngba ka ‘live telecast’ ha ‘YouTube Channel’ jong ka ‘Meghalaya Legislative Assembly’, bad ha ka por ba u myntri James u dang ïai ban ba ym lah ban ïarap ïa kum kita ki briew, kynsan la ïohi ba la wan ïaid uwei u nongtrei jong ka Dorbar Thawaiñ uba phong jaiñ lieh ban ai iwei i kot ïa u. Katba u dang kren bad pule jar jar artat ïa ita i kot, u la kylla ktien bad ong kynsan ba ki briew ki bym don ‘ration card’, kin sa ïoh khaw lada u tam na ka bhah ba la buh da ka sorkar pdeng lyngba ka ‘Atmanirbhar Scheme’. Donbok palat ba la wanpoi ita i kot, lym kumta la ïa duh khaw ki ba duk bapli! Ha shuwa, u la batai janai bha ba balei ka sorkar MDA kam lah ban ïaid lait na ki kyndon jong ka NFSA, bad kumta ki bym don ‘ration card’ ki hap thied khaw na ïew, hynrei hadien ba la ïoh ïa ita i jingthoh, u la kylla ktien. Katno la lehnohei ka por jong ka Dorbar namar ba ka jingïania ka la neh slem bha!

Haba ïapeit ïa kiwei ki myntri pat, ym donkam shuh ban batai janai ïa ka jingleh bym suidñiew ïa la ka jong ka kamram lada khmih ïa ka rulom jubab, kum u Bah Banteidor Lyngdoh, u Bah Samlin Malngiang, bad u Bah Kyrmen Shylla. Sa ïa peit hi maphi ki nongpule lada phim pat ïoh lad ban peit ha ‘YouTube’ ne ‘Facebook’. Ki don kiba ong ba hana ki dang dei ki ‘riew thymmai. Hooid, kidei ki ‘riew thymmai, hynrei ka kam kaba ki la jied ne shah jied ban trei pat ka ïadei bad ka ïap ka im jong ki paidbah. Kim don hok ban shu leh bym suidñiew.

Kaei kaba nga kwah ban kdew bad pynsgew ka long ba ka kynhun myntri kaba mynta ka la dei ban long kaba pynkhreh bad tista bha nangne shakhmat khamtam ha ka por ba long ‘session’ jong ka Dorbar Thawaiñ. Nga ong kumne namar ba mynta ïa kine ki jingïatai, lyngba ka kor ‘internet’, la lah ban peit da ki briew sawdong ka sla pyrthei. Kin don aiu tharai ban ong ïa ka kynhun myntri jong ka jylla Meghalaya? Haba ïa nujor te i kumba tang u Bah Prestone Tynsong bad u Bah Lakmen Rymbui kiba ïa trei minot bad shim khia ïa la ka kam.

Da ïa nujor bha ïa kiwei pade, i pynban ki kham tbit ki nongmihkhmat ki bym dei myntri, bad kiwei kiba don ha ka liang pyrshah kum u Bah SK Sunn, Bah HM Shangpliang, Bah George Lyngdoh, bad Bah Mayralborn Syiem. Nga jer kyrteng tang ïa kine namar ba ki dei ki MLA ba dang jop ha kane ka kynti, hynrei ïa mynta hi, ki i long shisha kita ki nongthawaiñ ba don ka mon ban trei tista ïa ka kam, bad ki jingkren ki jong ki ruh ki long kiba khia thew. Kane kam dei ka jingput turoi jubor jong nga shimet, hynrei lada phi ïa pule ïa ki ‘comment’ ne ki jingkynthoh jong ki ba bun ba lang ha ‘YouTube’ bad ‘Facebook’, kan sa pynshisha ïa kata.

Da kyrtiang dien pade sha ki por ba la leit noh, bad da pule ïa ki jingïatai nia ha ka Dorbar Thawaiñ naduh u snem 1972 ter ter, ngi ïohi ïa ka jingiapher ha ka ‘quality’ jong ki nongmihkhmat lyngba ki jingkren bad ki kam ki jong ki.

U Prof. Martin N. Majaw (ba la khlad), u nongmihkhmat barim jong ka Mawhati constituency bad u nongsaiñ dur jong ka Land Transfer Act, udei uwei na ki rangbah ba tbit bha ban pynshongnia ïa kaei kaba u kren. Ym tang kata, u la dei shisha u rangbah ba dap shynrang namar ba ha ka 27 tarik jong u bnai Jymmang, 1978, u la leit da lade sha khappud Block II ban weng ïa u maw pud ba la sieh donbor da ka jylla Assam ha ka por ba u long myntri jong ka tnat Revenue.

Ha kine ki khyndiat bnai shuwa ka Lockdown, nga la leit kai sha ki shnong Mawlasnai bad Khyndewso kiba don marjan bad ka Block II. Haba ïalap khana saiñ pyrthei ha kawei ka dukan sha, ryngkat bad ki nongshong shnong, ki ïathuh ba ka sorkar Assam mynta ka la buh da ki khyrdop pulit wat ha ki shnong ba sah bun ki Khasi kum ka shnong Sabuda bad Jatalong. Ki ‘riew rangbah ki ïai kynmaw ieid ïa ki nongmihkhmat barim ki jong ki, kum u Prof. Majaw bad Bah EK Mawlong (ba la khlad) kiba ju ïasaid bad jngoh dalade ïa ki jingeh kaba ki paidbah ki mad.

Uwei u rangbah u la ïathuh ba ha u snem 1979 eiei, u Bah Mawlong, ryngkat ka jingïadonlang jong u Prof. Chesterfield Khongwir, u nonghikai ba la shongthait jong ka St. Edmund’s College, bad ki nongshong shnong jong ki shnong ba hap ha ka Block II, ki la ïa mih paitbah ban tih hi ïa ka surok ba don kumba 800 mitar eiei, ha shnong Khlieh Umwang ban pyni ïa ka jinglong trai ri trai muluk ka jong ki, namar ba ka sorkar Meghalaya ha kato ka por ka leh bym suidñiew ia ki jingeh ki jong ki. Ar sngi kynthih ki la ïa trei bad ka la long ka jingïakhawai shnong kaba heh bad sah kynmaw ha kaba u Bah Mawlong u la thied uwei u masi, ar tylli ki sniang, bad bun tylli ki blang ban ïa bam khana paidbah yn da la dep tih ïa kata ka surok. Ki la ïathuh ruh ba bun sien ki la juh mih ki jingïakajia hapdeng ki Khasi bad Nepali ba shong ha ki shnong khappud, hynrei u Prof. Majaw bad Bah Mawlong ki la ïatrei ryngkat ryngkat ban wanrah ïa ka shongsuk shongshngaiñ da kaba ïasaid bad ki bor jong ka sorkar Assam ban pyllait ïa ki paidbah na ki jyrwit jyrwat.

Mynta pat? Dang don hi mo ki nongmihkhmat ba dap shynrang kum U Prof. Majaw bad Bah Mawlong? Dang don mo napdeng kine ki nongmihkhmat ba jam ka sur kum u syiar ryngkuh ym tang ha Dorbar Thawaiñ hynrei shabar jong ka ruh?

Nga kyrmen ba kine ki jingkylli kin kthik ïa ka jingmut jingpyrkhat jong ki nongmih khmat ba mynta, khamtam jong kito kiba shu pynlut por da kaba ktha kwai ne kiba shoh samthiah hapoh ka jaka kaba kyntang, ka ‘sanctum sanctorum’ kumba ong u Sitaram Yechury, kaba ngi tip kum ka Dorbar Thawaiñ.