Ïakhih ki nonghikai bad samla pule ka skulbah NEHU

Shillong, Nailur 8: Ka kynhun ki nonghikai jong ka skulbah NEHU kynthup ia ki samla pule bad ki nongtrei jong katei ka jaka pule kaba heh tam ha ka jylla ha ka sngi Ba ar ki la pynlong da ka jingdeng lama iong bad ka jingiakhih ba jar jar kum ka dak ka jingpyrshah ia ka jingtreikam jong u Vice Chancellor.

Ha ka jingiakren bad ki lad pathai khubor, u President ka NEHUTA, u Professor XP Moa u la ong ba kum ka synjuk kin ym ailad satia ba utei u VC un pynjlan ia ka samoi treikam jong u kaba la dei ban kut ha ka 23tarik mynta u bnai.

Na ka liang I Prof W Syiem jong ka English Department I la ong ba ka rukom treikam jong utei u VC ka long shilliang bha. La kynnoh ba ia ki briew kiba u iadei u kyntiew katba ia kiba um iadei u weng noh kynthup ia I Head of Department ka English.

“Baroh san snem ki kam ba u leh ki long ki kam shahliang suda bad lada ki kohnguh u kyntiew bad lada um iahap u weng noh, ” I la ong da ka kynnoh ba i Head of Department ka English ruh i ngat lang ha katei ka apot.

La pynpaw ruh ba kum ka synjuk ki kwah ba utei u khliehduh jong ka skulbah NEHU In mih mardor mar ia kut ka samoi treikam jong u.