Ïakhih ki nongkitkam shnong ka Mawryngkneng ba shah thok ha ka Sorkar

Shillong, Nailar 19: Ki nongsynshar shnong jong ki hynriew tylli ki Dorbar Shnong kiba hap ha ka thain Mawryngkneng ki la pynlong da ka jingshong kyllain myngor ha kane ka sngi Balang ha khmat ka PHC Mawryngkneng halor ka nongrim ba ka sorkar jylla lyngba ka tnad ka Koit ka Khiah ka la iai bteng ban thok ia ki nongialam shnong bad ki paidbah katei ka thain ban pynbiang bad pynjanai ia ka rukom treikam ha katei ka jaka ai jingsumar kaba don ha Mawryngkneng.


Haba kren bad ki lad pathai khubor, u Rangbah Shnong ka Mawryngkneng, Bah Peter J Lawai u la iathuh ba katei ka jingmih jong ki kum ki Rangbah Shnong ban pynlong da katei ka jingiakhih kadei namar ka tnad ka koit ka khiah kam shym la burom satia ia ka rai ba ka shim ha ka 12tarik u Jylliew ha ryngkat ka jingdonlang u MLA, MDC ka thain bad ki nongialam shnong. 

“Ha katei ka sngi u DHS u la kular hi ba hapoh u Naitung mynta u snem hi yn pynbiang ia u transformer na ka bynta ka hospital ba thymmai kaba la mang ban pynkynriah noh na ka hospital barim kaba treikam baroh shi katta,” ong u Bah Peter. 

Shuh shuh u ong ruh ba haduh mynta katei ka jingkular jong ka sorkar ka shu kut tang ha lyer bad ka jingkular jong u Myntri ka Koit ka Khiah lei lei ka la nang pynartatien shuh shuh ia ki khamtam haba ha u 2018 u la kular ba hapoh 6 bnai yn pyndep noh ia ka tei ka hospital ba thymmai bad ban pynkyntiew kyrdan noh sha ka CHC kaba khlem urlong haduh mynta mynne.  

“Lada ka tnad ka Koit ka Khiah ka sngewkhia balei pat ka kiar na ki Dorbar Shnong hynrei ka leh politik pynban,” u la bynrap biang. 

Nalorkata, u ong ruh ba kum ki Dorbar Shnong kin yn shong kli kti hynrei kin iai iakhun khnang ba ka thain kan ioh ia ka jaka ai jingsumar kaba biang nadong shadong. 

Katkum ka jingiathuh jong ki nongialam shnong, ka jingeh kaba ka thain ka kynduh kadei ka jingbym don ka ambulance kaba buh jingeh haduh katta katta ia ki paidbah lada jia ba ki doktor na Mawryngkneng ki phah ban leit shah sumar sha Shillong.

“Don ki khep ba ki paidbah ki hap ban ap haduh shi taiew ban ioh  leit sha ki hospital kiba don ha Shillong namar bym don ki ambulance khamtam ha kum kane ka por ba ki kali ki kiar bha ban leit Shillong na ka daw u COVID,” u la ong. 

Kawei pat ka jingeh kaba katei ka PHC ka kynduh kadei ka jingbym don ki tiar iada kum ki PPE, ki jingda khmat na ka bynta ki doktor, ki nurse bad ki nongtrei kaba buh ia ki ha ka jingma ban eksamin ia ki nongpang shwa ba kin ai dawai.     

La ong ruh ba kawei pat ka bynta kaba kum ki nongialam shnong ki sngewkhia kadei ka jingpynthiah shi jaka ia ki nongpang naduh kynthei shynrang bad haduh kiba pun kiba wan ban kha khunlung hangtei.     

U la ong ruh ba ka jingwan jong u COVID ka pynpaw pen ryngkew ia ka jingphlop treikam jong ka tnad ka Koit ka Khiah ha ki jaka nongkyndong. 

Kawei pat ka rai kaba kum ki hynriew dorbar shnong ki shim ha katei ka sngi ka long ban pynjur shuh shuh ia ki jingiakhun wat ban lum da u paidbah ban pyrshah ia katei ka jingkuman jong ka tnad ka koit ka khiah.