Ïakhih ki nongniah trok ha surokbah ha ka sngi leit ïuhkjat u MR ha East Jaiñtia hills

Shillong, Naiwieng 8: U Myntri Rangbah ka jylla Conrad K Sangma ha ka sngi Saitjain u la pynshai ia ka nongrim jong ka sorkar jylla hadien ba u iohi ia ka jingiakhih ki trok kit mar ha ki karkhana ba don ha East Jaintia ha ka por ba u dang leit sha Rymbai East Jaintia.

Haba kren bad ki lad pathai khubor u myntri rangbah u la ong ba naduh u snem 2002 ka dor bai kit mar ka neh kumjuh hynrei dei kane ka sorkar kaba pynkiew ia ka bai kit.

Tangba u ong pat ba ka kam kaba sah mynta ka long sa tang ban ia pynbeit hapdeng ki trai trok bad ki karkhana na ka bynta ban pyntreikam pura ia ka.

Lah ban kdew hangne ba ka kynhun ki trai bad nongniah jong ki trok kit mar ha ki karkhana dewbilat ha East Jaintia Hills ha ka step sngi Sngi Saitjain ki la mih sha rud surok bah ha Tuber ryngkat ki placard ha ka por ba u Myntri Rangbah u dang iaid lynti nangtei ban leit sha ka prokram ha Rymbai.

Katei ka jingmih jong kitei ki kynhun hapoh ka lama jong ka JAC ba kynthup ia ka Jaiñtia Hills Truck Owners’ and Driver Association (JHTOA), Meghalaya Truckers’ Union (MTU) bad ka All Jaiñtia Cement and Clinker Transports Association (AJCCTA) ka long halor ka jingpynslem jong ka sorkar ban pynkiew ia ka bai kit mar ha kitei ki karkhana.