Ïakynduh ki nongïalam ka PDF ïa u MR, dawa ban thung mardor ïa u Chairman MPSC

Shillong, Nailur 23: Ka seng saiñpyrthei People’s Democratic Front (PDF) ka la dawa na u Myntri Rangbah ka Jylla, Conrad K Sangma ba un tuklar khnang ban pynkloi ban thung Chairman noh ha ka tnad thung kam thung kam ka Jylla, ka Meghalaya Public Service Commission.

“Mynta la katto katne bnai ym pat ioh ia u Chairman ka MPSC bad ka jingwan jong ngi ka long ban kyntu ia u CM ba un tuklar ban pynkloi ban thung Chairman ba thymmai khnang ba kan ym don ka jingdkoh ha ka jingtreikam”, la ong u Bah Banteidor Lyngdoh, President hadien ka jingwan ia kynduh ia u Myntri Rangbah.

“Ka long kaba sngew synei ia ki samla wad kam, ki nongshong shnong ka Jylla hi baroh kawei kiba hap ap ban ialeh eksam na ka bynta ki kam kiba lait ha ki tnad bapher bapher bad kumjuh lada kan slem kan ktah wat ia ka rta trei ruh jong kiba aplai kam aplai jam” la ong u Bah Banteidor uba dei ruh u Myntri Sorkar Jylla.

“Kane ka long kaba donkam haduh katta bad Myntri Rangbah u la kular ba hapoh shi taiew yn leh noh ia kane ka mat”, u la ong. Ia u Bah Banteidor Lyngdoh la wan ban ia synran lang da u Bah Hamletson Dohling, Working President uba dei ruh u Myntri Sorkar Jylla ryngkat u Bah Auspicious Lyngdoh, General Secretary.

“Kane ka dei ka shuki treikam kaba donkam haduh katta bad donkam ia u briew ne ka briew kiba la don ka jingtbit. Ngi da thrang bad kyntu ia u Myntri Rangbah ba kin buh da u ne ka briew ki ban lah ban ai ka jingshakri kaba bha ban pyniaid bad pyntyllun ia ka jingtreikam ka MPSC ba kan long ka jingmyntoi ia ki Jylla”, u la ong.

“Ngi ong thung da u ne ka briew tangba ki ban noh synniang ban pynbit pynbiang ia ka MPSC bad khnang ba kan long kaba shai ha ka jingtrei kam kaba khlem don dak sniew eiei ruh. Ngi kwah ba ki briew ki ban trei ba kin long kiba shai bad iaid beit bad donkam ban pynthymmai ha ka jingtreikam ka tnad MPSC”, u la ong.

Halor ka jingdawa kiba bun ba yn leh video recording ia ka interview, u la ong, “Kane ka dei ka bynta ba ngi la dep pynpaw ba ka dei ban don ka jingtreikam kaba shai bad kaba khuid. Ngi kwah ia ki briew kiba khuid kiba lah ban pyntreikam ia ka kam khlem kano kano ka jingthohbria bad ka dei ka bynta ban don ka sakhi satar kaba biang ba kan ym don jingthung kam shiliang khmat hynrei ka dei beit ban long katkum ka jinglah jong ki”.

Ha kawei pat ka bynta, ka PDF ka la pynpaw beit ka jingpyrshah ia ka jingthmu ban wanrah ia ka rel kit mar sha ka Jylla. “Da dei ka rel kit mar ne kit briew ruh ngi la shong pyrkhat sani ha ka Party bad ngi shim ia ka rai jong ka Party hi baroh kawei ba ngin pyrshah ia kane”, u la ong.

“Ngi la peit bniah ia kita ki jingioh jingmyntoi ne jingduh jingmyntoi lada wan kita ki rel kit mar. Ka jingiakren kaba la ong ban wanrah rel kit mar haduh Byrnihat ne Khanapara hynrei na ka liang ka Party ngi pyrshah”, u la ong.