Ïap 2 ngut na u COVID-19, 89 ngut kiba pang bad 95 ngut kiba koit mynta ka sngi

SHILLONG, Nailur 18: Ka jylla Meghalaya ha ka sngi Thohdieng ka la sakhi arngut ki briew kiba khlad na ka daw u COVID kaba pynlong ia ka jylla ban poi mynta haduh 34 ngut.

Ha kane kajuh ka sngi ki la don haduh 89 ngut kiba ioh ia utei u virus katba kiba koit pat ki kot sha ka 95 ngut.

Haba kren bad ki lad pathai khubor, u Director of Health Services (MI), Dr. Aman War u la pyntip ba kitei kiba khlad ki kynthup ia ka Jamuna Sunar (44), na Pinewood Quarters, Shillong kaba la khlad ba ka por 9:20 am mynstep ha Nazareth Hospital.

Kawei pat kaba khlad kadei ba la tip kyrteng kum ka Anjali Barua, 60 snem na Laitumkhrah, Nongrimmaw.

Katkum ka jingiathuh da u Director katei ka longkmie ka la khlad lypa shwa ban poi sha Nazareth Hospital hynne ka 18 tarik por 12.45 mynsngi.

“Hadien ba la test la lap ba ka long positive,” ong u Dr. War.

Ha kajuh ka por, na ki 89 ngut kiba ioh thymmai ia utei u virus ki kynthup ia ki 70 ngut na East Khasi Hills bud sa ki 14 ngut na East Jaintia Hills 14, West Garo Hills – 02 ngut, Ri-Bhoi bad South West Khasi Hills bad South West Garo Hills mar iwei.

Kumba long mynta ka Meghalaya ka don haduh 1976 ngut kiba pang ha kylleng ki bynta ka jylla.

Ki 95 ngut kiba koit pat ki kynthup ia ki 39 ngut na Ri-Bhoi, West Garo Hills 28ngut, East Khasi Hills 19 ngut, North Garo Hills san ngut, West Khasi Hills lai ngut bad West Jaintia Hills arngut.

Ka jingdon kiba koit pat mynta ka la poi sha ki 2437 ngut ha baroh kawei ka jylla.