Ïap sa 2 ngut na u COVID-19 mynta ka sngi

Shillong, Nailur 9: Haduh arngut ki paidbah ki la.khlad ha ka janmiet sngi Baar bad step sngi Balang kaba pynlong ia ka jylla ban kiew mynta sha ka 19 ngut ka jingdon kiba iap.

Kitei ki arngut kiba khlad kidei kiba la tip kyrteng kum ka Usha Paul 58 snem na Laban kaba la khlad lypa ha shwa ban poi ha jaka sumar ha Nazareth Hospital ha ka por. 7.40 baje janmiet.

Kawei pat kadei kaba la tip kyrteng kum ka Tebu Chetri 78 snem na Qualapaty, Garikhana kaba la khlad noh hynne ka step por 6.20 baje mynstep hi ha Nazareth Hospital hi.

Katkum ka jingiathuh da u Director ka tnad ka Koit ka Khiah Dr. Aman War kitei baroh arngut kidei kiba don ia ka Hypertension nalor kiwei kiwei ki jingpang.

Ha kajuh ka por la iathuh ruh ba ki don haduh 121 ngut kiba dang ioh thymmai ia utei u virus hynne ka sngi. Kitei ki kynthup ia ki 30 ngut na East Khasi Hills, Ri Bhoi 2 ngut, South Garo – 4, West Garo Hills – 25 ngut, West Khasi Hills – 1, East Jaiñtia Hills – 59 ngut.

Ha kane ka juh ka sngi ki la don pat haduh 107 ngut kiba koit ha kane ka sngi. Kitei ki kynthup ia ki 88 na East Khasi Hills, 2 na South West Garo Hills, Ri Bhoi – 2, East Garo Hills – 2, East Jaintia – 4, West Garo Hills – 5 bad North Garo Hills – 4 ngut.

Lada khein lang baroh kiba koit haduh mynta ki long 1823 ngut haduh mynta.