Ïatylli ka liang synshar bad liang pyrshah haba ïatai halor ka mat kyrduh kam ki samla

Shillong, Lber 20: Ka mat kaba ïadei bad ka jingkyrduh kam ki samla jong ka Jylla ka la long kawei na ka jingïakren kaba la neh kham slem hapoh ka dorbar mang tyngka jong ka ïingdorbar mynta ka sngi haduh ba ka la pynlong ïa ki arliang mamla, ka liang synshar bad ka liang pyrshah ba kin long kawei ban ïatai na ka bynta katei ka jingeh.
Ïa katei ka mat la ïakren ha ka motion kaba la wanrah da u MLA ka Mawlai u bah Process T Sawkmie bad u MLA ka Mawphlang u bah SK Sunn.
Haba sdang ban ai jingkren, u MLA ka Mawlai u la ong, ka ladei ka por ba ka sorkar jylla kan tuklar bad ban bthah ïa ki ophis kiba na ka sorkar pdeng bad ki ophis shimet kynthup ki bank ba kidei ban ai kam ïa ki samla ka jylla kiba dei ki trai jaka.
Na ka liang u bah Process u la ong, ki samla ka jylla kidei ruh ban ïohkam ha ki tnat shipai kiba don ki ophis treikam hapoh ka jylla.
U bah SK Sunn pat u la ong, ka jingkyrduh kam ki samla ka kiew bha hapoh ka jylla bad katkum ka jinglum ïa ka jingtip kaba bniah na ka ophis jong ka Employment Exchange, ka jingdon ki samla kiba khlem kam khlem jam ka long 35000 ha Khasi bad Jaintia Hills bad 3500 ha Garo hills.
U bah Sunn uba long teng u ophisar jong ka tnat PHE mynshuwa, u la ong napdeng kine ki samla kiba khlem kam khlem jam, ki don ruh kiba dei ki engineer bad kiba la pyndep ïa ki jingpule ha ki kyrdan bapher bapher.
Ka nongmihkhmat na East Shillong, ka kong Ampareen Lyngdoh ka la ong, ka ladei ka por ban pynthymmai ïa ki prokram ai jinghikai ïa ki samla khnang ba kan nym don kano kano ka jingdkoh na ka bynta ki samla kiba iit kam.
U MLA ka Umroi, u bah George Lyngdoh u la ong, ki don bun ki institute hapoh ka jylla hynrei katno tylli pat kiba ai kam ïa ki samla jong ka Jylla kumta ka long kaba donkam ïa ka sorkar jylla ban peit bniah ba ki trai jaka kidei ban ïoh kam.
U bah George u ong, “Ka jingdon jong ka ICAR, CAU, NESAC kam da ïarap eh ïa ka jylla namar kiba bun ki leh bym patiaw ïa ka khyrnit kaba hynriew jong ka riti synshar paidbah haba ki pyntreikam ïa ka ophis jong ki hapoh ka jylla.
U MLA ka Congress na Nongthymmai, bah Charles Pyngrope u la ong, kawei ka jingeh jong ka jingkyrduh kam kadei ruh namar ki samla haba ki iit jingïarap kum ki loan na ki bank, ki hap ban mareh na kawei ka jaka sha kawei pat.
Kiwei ki MLA kiba la ai jingkren bad ban shim bynta lang ki kynthup ïa u Adelbert Nongrum, Zenith Sangma, Lambor Malngiang, Thomas Sangma, Saleng Sangma, bad Renikton Lyngdoh.

One thought on “Ïatylli ka liang synshar bad liang pyrshah haba ïatai halor ka mat kyrduh kam ki samla”

  1. Kwah ki khun samla ba ka sorkar kan ithuh noh ia ki nong shna film ha meghalaya
    Watla ki samla ki don ka sap ka phong hynrei long leh nohei namar ka sorkar kam shem la i thuh iangi ki nong pynmih film,namar kata nga kyrpad ba kum shi bynta ban iarap ia ki khun samla ki bym donkam donjam nga kyrpad ba sngewbha ban wanrah noh da ka industry hangne ha jylla

Comments are closed.