Ïoh COVID sa u BM ka SBI Khliehriat, kiew ka Meghalaya sha ka 9 ngut

Shillong, Jylliew 30: Sa uwei u rangbah ba dang wanphai na Assam u la paw ba u ioh ia u COVID-19 hadien ba la test ia u ha Khliehriat, East Jaintia Hills hynin ka sngi.

Katkum ka jingiathuh da u Myntri ka tnad ka Koit ka Khiah, Bah AL Hek, utei u rangbah uba dei ban leit trei ha State Bank of India, Khliehriat hynrei haba poi ha Khliehriat ki paidbah kiba peitngor ia ki briew ba wan thymmai mardor ki la pyntip sha u DC bad nangtei khlem pynslem la pyntip sha ka tnad ka Koit ka Khiah kiba la test bad lap ba u don ia utei u virus.

Halor kane ka jingjia, na ka liang u Bah Hek u la ong ruh ba lada lap ba utei u briew u pynkhein ia ki kyndon kin hap ban ujor pyrshah da ka Ejahar.

Ha kajuh ka por u la iathuh ba ka jylla mynta ka la kiew sha ka  9ngut kiba don ia utei u virus katba kiba la koit ki long 42 ngut.