Ïoh kurup ki pulit ka Ri Bhoi haduh 1100 kilo u Ganja

Nongpoh, Lber 17: Da ka jingtreishitom kaba la neh mynta la bun bun sngi ban iohkem ia ki nongshalan ia ki mar jingdih buaid bad kiba iaid ba ieng lyngba ka National Highway, Ri Bhoi District, hynne ka step, na ka liang ki bor pulit jong ka District na Byrnihat Police Outpost, ki la ioh ban kem noh ia kawei ka trok kaba la kit ia u ne u jingdih buaid u la tip kum u Ganja (Marijuana) na 12 Mer, Byrnihat Ri Bhoi District.
Katkum ka khubor na ki pulit, la iathuh, ba hadien ka jingioh jingtip halor ka jingdon jong kawei ka trok kaba la kit ia u tei u Ganja, na ka liang ki pulit ki la pynapshrip noh ha 12 Mer, Byrnihat, bad dei ha ka por 8 baje mynne mynstep, ba ki pulit ki la ioh bat noh ia kane ka trok kaba don ia u number TR 01-D-1606 bad la ioh ban kurup ruh ia u Ganja u ba la don haduh 50 paket tam eiei, ha ka jingkhia kaba la long palat 1100 kilo bad u ba la shongdor ia palat 20 haduh 30 lak tyngka eiei.
La iathuh ruh, ba kane ka trok kaba la kit ia u tei u ganja ka dei kaba la wan kit na Tripura bad kaba la thmu ban leit shalan pat sha Assam, ha kane ka jingiohkem jong ki pulit ka la pynpulom noh ia kane ka jingthmu jong ki nongshalan ia u ne u ganja ban leit shalan sha Assam.
Ki pulit ki la ioh ban kem ruh, ia ki ar ngut ki briew kiba kynthup ia u nongniah jong kane ka trok u ba la tip kyrteng kum u Dilip Das bad u nongbud jong kane ka trok u ba kyrteng kum u Deepak Das.
Katkum ka jingioh khubor, la ong pat, ba ka jingiaid jingieng jong ki nongshalan ia kum kine ki jingdih buaid lyngba ka National Highway, Ri Bhoi District, ka la nang jur bha hadien ka jingiohkem jong ki na ka por sha ka por ia kum kine ki jingshalan ia kitei ki mar jingdih buaid.
Na ka liang ki pulit, ki dang pynlong shuh shuh ia ka jingtohkit kaba jur halor kane ka jingshalan ia u ganja bad ruh ban iohkem pat ruh ia kito kiba donkti ha kaban leh ia kane ka kam shalan ia kum kine ki mar jingdih buaid.