Ïoh pang Covid 3 ngut ki doktor ka NEIGRIHMS kynthup ka nos na Civil hospital

Shillong, Nailar 07 : Lai ngut ki doctor jongka North Eastern Indira Gandhi Regional Institute of Health and Medical Sciences (NEIGRIHMS), kynthup ia kawei ka nurse na Civil Hospital ki la donlang ha ka thup jongki 16 ngut kiba ioh thymmai ia u COVID-19 hynne ka sngi.

Haba pyntip ia kane, u Myntri ka tnad ka Koit ka Khiah ka jylla, Bah AL Hek u la iathuh ba na kitei ki 16 ngut kiba ioh thymmai, haduh 11 ngut ki dei na East Khasi Hills(san ngut ki shipai, kawei ka nurse bad arngut kiba wanphai na bar jylla bad laingut ki doctor). Katba kiwei pat ki kynthup ia iwei na West Garo Hills, East Jaintia Hills iwei bad West Khasi Hills iwei nalor ka Ri Bhoi kaba ioh arngut.

U Myntri u la pyntip ruh ba ki arngut kiba ioh COVID ha Ri Bhoi ki dei ki shipai, katba ha East Jaintia Hills pat dei u nongniah kali jong ka karkhana dewbilat Topcem katba ha West Khasi Hills pat dei jong iba wanphai na shabar jylla.

La ithuh ruh ba ka jylla mynta ka don haduh 590 ngut ki briew kiba dang shah sumar.

Lada phai sha ki distrik baroh haba iadei bad ka jingioh COVID ka East Khasi Hills ka wan ba nyngkong da ki 446 ngut, West Khasi Hills – 06, Ri-Bhoi- 72, West Jaintia Hills- 16, East Jaintia Hills – 18, West Garo Hills – 28, South West Garo Hills – 02 bad South Garo Hills ruh 02ngut.

Ha kane ka sngi ki la don ruh haduh 66 ngut ki briew kiba la koit kaba pynlong ia ka jylla ban don haduh 411 ngut kiba koit. Na kine, 63 ngut kiba koit ki dei tang ha East Khasi Hills kata 12 ngut ki riew paidbah bad 51 ngut ki BSF katba ha West Garo Hills kiba koit ki kynthup ia arngut ki riew paidbah kumjuh ha West Jaintia iba ioh ruh dei i riewpaidbah.

Na ka liang u DHS, Dr. Aman War u la iathuhruh ba haduh hynne ka sngi ki la don haduh 86 ngut ki briew kiba dei ki high risk bad low risk contact kiba la ioh ban buddien na u nongtrei jongka Civil Hospital kum u pharmacist uba la pynkhein ia ki kyndon quarantine ha ka por ba u mih ban leit buh ia ka lok jong u sha Rangthong PHC kaba ha South West Khasi Hills shwa ban un ioh ia ka result jong ka test Covid. Hynrei dei ynda la wanphai ba la tip ba u la ioh ia utei u khniang jingpang.

Ha kane kajuh ka sngi, u DHS u la iathuh ba watla u la ioh jingtip ba don sa uwei pat u rangbah uba iap na ka daw ka jingpang khyllai hynrei la ong pat ba na ka liang ka NEIGRIHMS kam pat pyntip satia halor ka jingiap jongu la ka don neem ka jingiadei bad ka jingpang COVID.