Ïoh pang COVID 5 ngut ki nos na Nazareth

Shillong, Nailar 24 : Ka Jylla ha ka sngi Nyngkong ka la sakhi biang ba ka jingdon ki briew kiba ïoh ïa u COVID -19 ka la poi haduh 59 ngut ba kynthup ia ki 5 ngut ki nos na Nazareth Hospital, Shillong kaba pynlong artad ia ka jylla ban don haduh 1179 ngut kiba don ia utei u khniang jingpang.

Haba phai pat sha ki 59ngut kiba ïoh thymmai ïa utei u virus, tang ka East Khasi Hills marwei ka la don haduh 55 ngut, kata kynthup ïa 09 ki shipai bad 46 ngut ki riew paidbah, nangta 4 ha Ri Bhoi ba kynthup ia arngut ki shipai bad arngut ki riew paidbah.

Lada phai pat sha ki distrik, ka jingdon kiba ïoh ïa utei u virus haduh mynta ki long East Khasi Hills – 769, West Garo Hills – 223ngut, Ri-Bhoi – 98 ngut, West Khasi Hills – 43, East Jaiñtia Hills – 12, South Garo Hills – 12 ngut, North Garo Hills – 12, South West Garo Hills – 02, East Garo Hills – 03, West Jaiñtia Hills – 02 bad South West Khasi Hills – 01.

Haba kren bad ki lad pathai khubor, u Myntri ka Koit ka Khiah u la pyntip ruh ba ki don 13 ngut kiba koit hynne ka sngi, ba kynthup iwei ha West Khasi Hills, ar ha East Jaintia, 9ngut ha East Khasi Hills bad iwei ha West Jaintia Hills.