Ïoh rung ka khlam COVID-19 sa ha phatok, pynbna u Dr. Aman Warr

Shillong, Risaw 15: Ka jylla ha ka sngi Palei ka la sakhi ba u khniang jingpang COVID 19 u la sdang ban pur wat ha ki phatok bad ha iing jong ki riewniam ruh.

Katkum ka jingiathuh da u Director ka tnad ka Koit ka Khiah, Dr. Aman Warr, hynin ka sngi ki la don haduh san ngut ki koidi na Shillong District Jail kiba la paw ba ki ioh ia utei u khniang jingpang ha kaba arngut na ki, ki dei kiba la ioh teng kham mynshwa.

U la iathuh ruh ba arngut na kitei ki koidi ki dei kiba dang shu ioh shen ia ka syrnod ba ki la koit na utei u virus hadien ba ki la pyndep ia ka jingtest ha shwa ban rah biang pat ia ki sha phatok.

U DHS u ong ruh ba ka tnad kan hap ban buddien bad wad bniah halor katei ka jingiabit biang jogn kitei ki arngut ia utei u khniang jingpang.

Ha kajuh ka por, u la iathuh ba na ki 173 ngut kiba ioh thymmai ia utei u khniang jingpang, haduh 63 ngut kidei tang na ki jaka jong ki riewniam kiba don ha Mawlai, kynthup ia ka Sacred Heart Theological College.

Nalor kine,  ha kane ka sngi ka jylla ka sakhi ba ki don pat 64 ngut kiba koit nalor ki 3 ngut kiba khlad kiba dei baroh na East Khasi Hills. Kitei kiba khlad ki kynthup ia ka Jubita Thabah 65 snem na Lum Dorbar, Upper Lumparing nangta u Sagar Barua, 82 snem na Thana Road  bad ruh ka Basuk Thabah, 42 snem na Lawsohtun, Block I.